Meta ka patentuar një model inteligjence artificiale që, teorikisht, mund të vazhdojë aktivitetin e një përdoruesi në rrjetet sociale edhe pas vdekjes së tij. Patenta, e miratuar në dhjetor, përshkruan një model gjuhësor të madh të aftë të krijojë një “klon dixhital” të përdoruesve, duke simuluar sjelljen e tyre online përmes postimeve, fotove, videove dhe ndërveprimeve me të tjerët.
Sipas dokumentacionit, teknologjia mund të postojë përmbajtje në emër të përdoruesit, t’u përgjigjet mesazheve private, të pëlqejë apo komentojë postime dhe madje të ndërveprojë me ndjekësit. Në rastin e influencerëve, modeli mund të imitojë stilin e tyre të komunikimit dhe të vazhdojë të prodhojë përmbajtje të re, edhe gjatë mungesave të gjata ose pas vdekjes. Patenta përmend gjithashtu mundësinë e simulimit të thirrjeve audio ose video, duke krijuar një përvojë edhe më realiste për ata që ndërveprojnë me “klonin” dixhital.
Modeli AI është trajnuar mbi historikun e aktivitetit të përdoruesve në rrjete sociale, përfshirë pëlqime, komente, shpërndarje, mesazhe, si dhe materiale vizuale dhe video. Kjo i mundëson sistemit të ruajë një vazhdimësi të stilit personal dhe të sjelljes online.
Një zëdhënës i Meta konfirmoi ekzistencën e patentës, por theksoi se kompania nuk ka plane konkrete për ta përdorur këtë teknologji për të postuar në emër të përdoruesve të vdekur. Sipas tij, patentat shërbejnë për të mbrojtur ide dhe koncepte, pa nënkuptuar domosdoshmërisht zbatim praktik.
Ekspertët theksojnë se përdorimi i një teknologjie të tillë do të sillte sfida serioze ligjore dhe etike. Duke folur për Business Insider, profesorja Edina Harbinja nga University of Birmingham paralajmëroi për rrezikun e shkeljes së të drejtave dixhitale dhe privatësisë pas vdekjes. Ndërkohë, Joseph Davis nga University of Virginia shprehu shqetësim për ndikimin emocional te familjarët dhe miqtë, duke argumentuar se kompanitë duhet të “lejojnë të vdekurit të prehen”, në vend që t’i rikrijojnë virtualisht përmes AI.
