Sëmundjet kardiovaskulare janë shkaktarët më të mëdhenj të vdekjeve në të gjithë botën. Dhe pse gjatë viteve të fundit është arritur të krijohen shumë mënyra për të parandaluar këto sëmundje, problemet vazhdojnë të ekzistojnë pasi jo të gjithë personat kanë akses mbi to ose nuk ndjekin një plan trajtimi që mund të zgjasë për pjesën e mbetur të jetës së tyre.
Mirëpo Verve Therapeutics Inc. ka propozuar një zgjidhje radikale për këtë problem: modifikimin e gjenomës së një personi për të ndaluar grumbullimin e “kolesterolit të dëmshëm” në enët e gjakut.
“Ne jemi shumë pranë transformimit të trajtimit të kësaj sëmundjeje, që mund të marrë fund me një ndërhyrje të vetme.” tha Sekar Kathiresan, CEO i kompanisë. Fillimisht pacientët e parë që do të marrin këtë trajtim pritet të jenë personat që e kanë kaluar më parë një atak zemre të shkaktuar nga hiperkolesterolemia familjare, një sëmundje e trashëguar gjenetikisht që prek 31 milionë njerëz në botë.
Nëse ky trajtim arrin të ulë nivelet e LDL (kolesteroli i dëmshëm) në këto pacientë, do të fillohet përhapja e tij në më tepër persona. Verve po zhvillon medikamente të fokusuara në 2 gjene: PCSK9 dhe ANGPTL3. Disa prej pacientëve do të kenë nevojë vetëm për njërin prej medikamenteve, ndërsa disa të tjerë për të 2-ja.
Deri më tani, analistët parashikojnë se kjo terapi nga Verve do të kushtojë nga $50,000 – $200,000 për pacient.
