Herë pas here Apple publikon një raport mbi mënyrat se si produktet e saj arrijnë të shpëtojnë jetën e njerëzve përmes shërbimeve dhe teknologjisë që ato ofrojnë. Dhe pse shumica e këtyre shërbimeve jetëshpëtuese janë të pranishme në Apple Watch, ekzistojnë gjithashtu dhe pajisje të tjera të cilat mund të jenë tepër të rëndësishme në raste emergjente.
Më poshtë do të tregojmë 7 mënyra se si pajisjet e Apple mund të shpëtojnë jetën tuaj.
Emergency SOS
Emergency SOS është një shërbim i pranishëm në serinë 14 të iPhone-ve i cili bën të mundur që ju të shpërndani vendndodhjen tuaj në situata emergjente ku nuk keni valë telefonike. Vendndodhja arrin të dërgohet përmes valëve satelitore drejt kontakteve tuaja të emergjencës dhe policisë.
Medical ID
Në rast se ju jeni të pavetëdijshëm pas një aksidenti apo problemi tjetër stafi mjekësor mundet të shikojë Medical ID në smartphone-in tuaj. Medical ID mund të aksesohet dhe në qoftë se iPhone-i juaj është i kyçur, dhe ka të regjistruara informacione shëndetësore si gjatësia, pesha, grupi i gjakut, alergjitë, sëmundjet kronike, medikamentet që merrni e shumë informacione të tjera.
Fall Detection
Nëse ju keni një Apple Watch Series 4 ose më të re, Fall Detection është i pranishëm për t’ju shpëtuar. Nëse kjo orë zbulon se ju jeni rrëzuar, do të presë për një ndërhyrje tuajën, dhe nëse ndërhyrja nuk vjen do të informojë kontaktet e emergjencës me vendndodhjen tuaj.
Crash Detection
Crash Detection funksionon në mënyrë të ngjashme me Fall Detection. Ky shërbim mbështetet në sensorët e lëvizjes dhe mikrofonët e pajisjes për të funksionuar dhe është e pranishme në iPhone 14, Apple Watch Series 8 dhe Apple Watch Ultra.
Heart Health
Ky shërbim monitoron rrahjet tuaja të zemrës, mund të performojë një EKG për të kontrolluar ritmin e zemrës, si dhe njofton përdoruesit sa herë dyshon se mund të keni fibrilacion atrial. Në këtë mënyrë ju mund të kërkoni ndihmë mjekësore para se situata të përkeqësohet.
Sound Recognition
Nëse ju jeni gjatë gjithë kohës në kufje apo keni probleme me dëgjimin, mund të mos dëgjoni alarmin e një zjarri. Prandaj iPhone dhe iPad do t’ju njoftojë kur të zbulojë praninë e një alarmi të tillë përreth jush përmes shërbimit Sound Recognition.
Find My
Find My në iOS, iPadOS, macOS dhe watchOS mund të shpëtojë jetën tuaj në raste të ndryshme nëse të gjitha shërbimet e tjera nuk funksionojnë. Ne sugjerojmë që ju të shpërndani vendndodhjen tuaj në Find My me një mik që e besoni. Duke aksesuar vendndodhjen tënde, miku yt mund të lajmërojë policinë në raste emergjence.
