Qeveria angleze po shqyrton një rishikim të ligjit që do t’i lejojë zhvilluesit e AI të përdorin përmbajtjen e krijuesve në internet për të ndihmuar në zhvillimin e modeleve të tyre, nëse mbajtësit e të drejtave nuk zgjedhin të largohen nga ky program. Sir Paul McCartney ka treguar në një intervistë për BBC me Laura Kuenssberg se ndryshimet e propozuara në ligjin për të drejtën e autorit do ta bëjë të pamundur për muzikantët dhe artistët të sigurojnë jetesën.
Kjo gjë mund të dekurajojë artistët e rinj që të merren me muzikë, si dhe të humbin kreativitetin e tyre. Qeveria tha se synonte të ofronte siguri ligjore përmes një regjimi të së drejtës së autorit që u siguronte krijuesve “kontroll të vërtetë” dhe transparencë.
Ai i bëri thirrje qeverisë që të mendojë përsëri për planet e saj, duke thënë: “Ne jemi populli, ju jeni qeveria! Ju duhet të na mbroni. Kjo është puna juaj. Kështu që ju e dini, nëse jeni duke miratuar një projektligj, sigurohuni që të mbroni mendimtarët krijues, artistët krijues, ose nuk do t’i keni më ata.”
Në vitin 2023, Sir Paul dhe bateristi i Beatles Sir Ringo Starr përdorën AI për të nxjerrë vokalin nga një demo e papërfunduar e lënë nga John Lennon për të prodhuar një këngë të re, Now and Then. Kënga, e cilësuar si publikimi përfundimtar i Beatles është nominuar për dy Grammy dhe një çmim Brit.
“Unë mendoj se AI është e mrekullueshme dhe mund të bëjë shumë gjëra të mëdha,” tha Sir Paul. “Ne morëm një kasetë të vjetër të John-it dhe ia pastruam zërin, dhe dukej sikur ishte regjistruar dje. Pra, ka përdorimet e veta. Por kjo nuk duhet të na “rrëmbejë” njerëzit krijues.”
Qeveria aktualisht është duke u konsultuar mbi propozimet që do t’i lejojnë kompanitë e AI të përdorin materiale që janë të disponueshme në internet pa respektuar të drejtën e autorit nëse e përdorin atë për nxjerrjen e tekstit ose të dhënave. Programet gjeneruese të inteligjencës artificiale nxjerrin ose mësojnë nga sasi të mëdha të dhënash si teksti, imazhet ose muzika në internet për të gjeneruar përmbajtje të re që duket sikur është krijuar nga një njeri.
Propozimet do t’u jepnin artistëve ose krijuesve një të ashtuquajtur “rezervë të të drejtave” – aftësinë për të hequr dorë nga ky program. Por kritikët e planit besojnë se nuk është e mundur që një shkrimtar ose artist individual të njoftojë mijëra ofrues të ndryshëm të shërbimeve të AI se nuk duan që përmbajtja e tyre të përdoret në atë mënyrë, ose të monitorojë se çfarë ka ndodhur me punën e tyre në të gjithë internetin.
Një propozim alternativ për artistët që të zgjedhin të japin lejen e tyre për përdorimin e përmbajtjes së tyre do të paraqitet në Dhomën e Lordëve nga baronesha Kidron këtë javë.
Tom Kiehl, shefi ekzekutiv i organit të industrisë muzikore UK Music, tha: “Qeveria planifikon të ndryshojë ligjin e të drejtave të autorit për ta bërë më të lehtë për firmat e AI përdorimin e muzikës së artistëve, kompozitorëve dhe kompanive muzikore pa lejen e tyre, duke e vendosur industrinë e muzikës në një rrezik të madh. Do të ishte një goditje e madhe kundër sektorit krijues që tashmë po kontribuon mbi 120 miliardë paund në ekonomi dhe do të ishte kundërproduktive ndaj ambicieve të rritjes së vetë qeverisë.
