Google ka njoftuar zgjerimin global të shërbimit të saj të fuqizuar nga inteligjenca artificiale, Search Live, duke e bërë atë të disponueshëm në të gjitha gjuhët dhe rajonet ku ofrohet AI Mode. Me këtë hap, përdoruesit në më shumë se 200 vende dhe territore do të kenë akses në këtë veçori, e cila synon të ofrojë ndihmë në kohë reale në mënyrë më natyrale dhe interaktive.
Search Live u lançua për herë të parë në korrik 2025 dhe deri më tani ishte i kufizuar vetëm në SHBA dhe Indi. Shërbimi u lejon përdoruesve të drejtojnë kamerën e telefonit drejt objekteve përreth dhe të bëjnë pyetje me zë, duke marrë përgjigje të menjëhershme që bazohen jo vetëm në fjalët e tyre, por edhe në kontekstin vizual që kap kamera. Kjo krijon një përvojë kërkimi më dinamike, ku dialogu mund të vazhdojë me pyetje shtesë dhe eksplorim të lidhjeve në ëeb.
Zgjerimi global është bërë i mundur falë modelit të ri audio dhe zanor Gemini 3.1 Flash Live, i cili, sipas kompanisë, ofron biseda më të natyrshme, intuitive dhe të rrjedhshme. Për të përdorur Search Live, përdoruesit duhet të hapin aplikacionin Google në Android ose iOS dhe të prekin ikonën “Live” nën shiritin e kërkimit. Funksioni mund të aksesohet edhe drejtpërdrejt nga Google Lens, duke zgjedhur opsionin “Live”.
Në të njëjtën kohë, Google ka njoftuar zgjerimin e funksionit “Live Translate” të Google Translate në iOS dhe në më shumë vende. Ky funksion u lejon përdoruesve të dëgjojnë përkthime në kohë reale përmes kufjeve dhe tani mbështet mbi 70 gjuhë, duke e bërë komunikimin ndërkombëtar më të lehtë si në Android ashtu edhe në iOS.
