Google ka publikuar në Nature një studim që tregon se si një smartphone i zakonshëm mund të shndërrohet në mjet monitorimi të shëndetit të zemrës. Gjiganti i teknologjisë ka zhvilluar një sistem kërkimor të quajtur Passive Heart Rate Monitoring During Smartphone Use in Everyday Life (PHRM), i cili mat rrahjet e zemrës dhe rrahjet në gjendje pushimi duke përdorur kamerën selfie të telefonit.
Sistemi funksionon menjëherë pasi përdoruesi zhbllokon pajisjen, duke regjistruar për disa sekonda video të fytyrës. Përmes fotopletizmografisë (PPG), PHRM analizon mënyrën se si drita reflektohet nga lëkura, duke kapur ndryshimet mikroskopike që ndodhin sa herë që gjaku pulson në enët e gjakut. E gjithë kjo përpunohet direkt në pajisje, pa pasur nevojë për pajisje shtesë apo sensorë të jashtëm.
Google thotë se sistemi është trajnuar me mbi 350 mijë video nga afro 700 pjesëmarrës, si në kushte laboratorike ashtu edhe në jetën reale. Një element kyç i studimit ishte përfshirja e një game të gjerë tonesh lëkure, duke përdorur shkallën Monk, me qëllim testimin e saktësisë dhe barazisë së algoritmit. Sipas rezultateve, PHRM arrin një gabim mesatar nën 10% krahasuar me një EKG direkte, ndërsa për vlerësimin e rrahjeve të zemrës në pushim, saktësia është e krahasueshme me pajisjet “wearable”, me një devijim më të vogël se 5 rrahje në minutë.
Megjithatë, Google pranon se sistemi ka kufizime. Performanca është më e ulët te përdoruesit me tone më të errëta lëkure, kryesisht për shkak të vështirësisë në zbulimin e sinjalit PPG, si dhe në raste kur përdoruesit flasin ose lëvizin kokën. Në të ardhmen, kompania synon të përmirësojë ekspozimin e kamerës, stabilizimin e videos dhe përdorimin e sensorëve të tjerë për të rritur saktësinë.
