Në WWDC 2025, Apple prezantoi përditësime të gjera për të gjitha platformat e saj softuerike, me theks te dizajni i ri, mjetet e produktivitetit dhe integrimi i thelluar i inteligjencës artificiale Apple Intelligence.
Elementi kryesor ishte prezantimi i gjuhës së re të dizajnit Liquid Glass, që sjell ndërfaqe gjysmë-transparente dhe pamje më të unifikuar për iOS, iPadOS, macOS dhe watchOS. Kjo konsiderohet si përditësimi më i madh vizual që ka bërë Apple deri më sot. Po ashtu, Apple po heq dorë nga numrat serikë në sistemet operative; për shembull, në vend të iOS 19, përditësimi i ardhshëm për iPhone do të quhet iOS 26,në përputhje me vitin 2026.
iOS 26
iOS 26 sjell një pamje më të rafinuar me elementë më të butë, menu transparente dhe një ndërfaqe më koherente, e frymëzuar nga visionOS. Phone app përjeton ridizajnimin më të madh ndonjëherë, me qasje të shpejtë në kontakte, thirrje dhe mesazhe zanore, plus funksionin e ri Hold Assist.
Messages shton opsione si ndryshimi i ngjyrës së sfondit për grupet, sondazhe, filtrimin e spam-it dhe përkthimin e drejtpërdrejtë gjatë shkrimit. Prezantohen Genmoji të gjeneruara nga AI, që përfshijnë kombinime emoji dhe krijime përmes ChatGPT.
Apple Maps përmirësohet me sugjerime rrugësh sipas rutinës suaj dhe historikut të vendeve të vizituara. Ndërkohë, Wallet mbështet Digital ID dhe boarding pass të përditësuar. Aplikacioni i ri Games grumbullon të gjitha lojërat e shkarkuara dhe ato të Apple Arcade, si dhe sjell funksionin Challenges për garë mes miqve.
Visual Intelligence nga ana tjetër mundëson kërkim vizual të përmbajtjeve që shfaqen në ekran përmes screenshot-eve, duke lejuar kërkime të sakta dhe të përparuara.
watch OS 26
Në watchOS 26, dizajni Liquid Glass shoqërohet me Workout Buddy, një trajner zanor që ju udhëzon në kohë reale gjatë stërvitjes. Smart Stack përshtatet automatikisht sipas zakoneve tuaja, për shembull, kur hyni në palestër, ju shfaq shpejt aplikacionin për stërvitje.
macOS Tahoe sjell pamjen Liquid Glass në Mac, me funksione të reja si aplikacioni Phone që tani funksionon edhe në desktop. Intelligent Shortcuts ju lejojnë të krijoni automatizime me AI. Spotlight tani është më i fuqishëm, mund të ekzekutojë detyra me shumë hapa dhe të ruajë historikun e clipboard.
iPadOS 26
iPadOS 26 përfshin shumicën e risive të iOS 26, por shton një shirit të ri menusë dhe menaxhim dritaresh për multitasking më të mirë. Përdoruesit mund të ndryshojnë madhësinë e dritareve dhe të kalojnë ndërmjet aplikacioneve me lehtësi. Aplikacioni Files përmirësohet, ndërsa një aplikacion i ri Preview sjell menaxhim dhe redaktim të PDF-ve. Mund të regjistroni zë në cilësi studioje përmes AirPods dhe të përdorni funksionin e ri të regjistrimit të videove në mbledhje apo podcast-e.
vision OS 26
visionOS 26 shton spatial widget dhe spatial scenes, që përdorin AI për të gjallëruar fotot përmes Vision Pro. Përditësimi sjell mbështetje për kontrollorët e PlayStation VR2 Sense dhe shton scrolling me sy duke e bërë pajisjen më konkurruese për lojëra dhe më intuitive për përdorim.
tvOS 26
Së fundmi, tvOS 26 përfiton nga dizajni Liquid Glass, pamje më kinematike dhe profile të personalizuar në Apple TV+. Apple Music në Apple TV merr një funksion karaoke, ku mund të këndoni duke përdorur iPhone-in si mikrofon.
