Pak më shumë se një vit pas lançimit të tij dhe përditësimeve të vazhdueshme, Gemini do të zëvendësojë Google Assistant në telefonat Android më vonë gjatë vitit 2025.
Google njoftoi sot se “Asistenti klasik i Google nuk do të jetë më i aksesueshëm në shumicën e pajisjeve celulare“. Kjo do të ndodhë “më vonë gjatë këtij viti“. Në muajt e ardhshëm, përdoruesit e Assistant do të shohin një kërkesë të re përmirësimi.
Do të ketë një përjashtim për telefonat që përdorin Android 9 ose më të hershëm dhe që nuk kanë të paktën 2 GB RAM, megjithatë këta persona do të vazhdojnë të përdorin Google Assistant. Kompania mori vendimin për zëvëndësimin e asistentit dixhital pas prezantimit të smartphone-ve të rinj Android gjatë këtij viti që mbështetën që në fillim Gemini. Gjithashtu, Google thotë se “miliona njerëz e kanë bërë këtë zëvëndësim prej kohësh“.
Kur Gemini u prezantua në shkurt të vitit 2024, nuk ishte pajisur ende me aftësitë e duhura për të qenë një asistent inteligjent, por ka punuar për të adresuar këtë boshllëk me veçori si aksesimi i Gemini në ekranin e kyçjes dhe lejimi i tij të kontrollojë aftësitë e telefonit me Utilities.
Dhe pse Google Assistant mund të konsiderohet si një teknologji e vjetër tashmë, kompania thekson se ishte pikërisht kjo “teknologji e përpunimit të gjuhës natyrore dhe njohjes së zërit zhbllokoi një mënyrë më të natyrshme për të marrë ndihmë nga Google” në 2016.
Google konfirmoi se Gemini do të vijë dhe tek orët inteligjente, makinat, tabletët dhe kufjet. Gjithashtu një përvojë e re, e mundësuar nga Gemini do të vijë drejt altoparlantëve, ekraneve dhe televizorëve, me më shumë detaje në muajt e ardhshëm.
