CEO i Apple, Tim Cook ka konfirmuar se ai ka investuar një pjesë të pasurisë së tij në kriptomonedha gjatë një bisede në konferencën Dealbook të New York Times. “Unë mendoj se është e arsyeshme të blesh kriptomonedha si pjesë e një portofoli të ndryshëm. Unë nuk po i jap askujt një këshillë investimi, meqë ra fjala.” tha ai pa specifikuar se në cilat kriptomonedha kishte investuar.
“Kam qenë i interesuar prej disa kohësh mbi kriptomonedhat. Kam bërë disa kërkime dhe deri më tani mendoj se është interesante.” shtoi Cook.
Tim Cook of Apple reveals that he has personally invested in cryptocurrency. “I think it’s reasonable to own it as part of a diversified portfolio,” he said at the #DealBook Online Summit. https://t.co/xpahdlKfOe pic.twitter.com/CQpQgShu0x
— DealBook (@dealbook) November 9, 2021
Dhe pse ai i kishte investuar paratë e tij në kriptomonedha, u tregua shumë i rezervuar në lidhje me planet e kompanisë mbi këtë investim. Ai përjashtoi planin e investimit të pasurisë së kompanisë që ai drejton në kriptomonedha dhe tregoi se Apple nuk ka në plan që të lejojë njerëzit që të kryejnë pagesa me to në të ardhmen e afërt.
Kur u pyet në lidhje me NFT, Cook tha se ato duken “interesante” por do të duhet pak kohë derisa të aplikohet në masë. Gjatë kësaj bisede analistët ngritën pyetjen se a do të ishte mirë sikur përdoruesve t’u jepej e drejta për të instaluar aplikacione nga burime të tjera përveç App Store, por njësoj si Craig Federighi, Tim Cook vuri theksin mbi sigurinë.
“Nëse ju dëshironi të instaloni aplikacione jashtë dyqanit zyrtar, atëherë ju duhet të blini një Android pasi ky sistem operativ ju lejon ta bëni këtë gjë. Për ne është shumë e rrezikshme ta bëjmë një gjë të tillë, pasi në këtë mënyrë nuk do të mund të sigurohej siguria dhe privatësia e përdoruesve.”
