Një grua nga Missouri, e njohur si @mollykayemck në TikTok, ka dhënë një paralajmërim për ata që ndajnë informacione personale me ChatGPT: është më i zgjuar se sa mendoni. Gjatë procesit të saj të fekondimit in vitro (IVF), ajo përdori chatbot-in e OpenAI si burim informacioni dhe mbështetje emocionale. Ajo kishte kërkuar që klinika të mos i zbulonte gjinitë e embrioneve, duke ruajtur një element surprize në procesin e IVF.
Edhe pse raporti i laboratorit kishte fshehur me një shirit të zi kromozomet X dhe Y, Molly e ngarkoi dokumentin në ChatGPT për të analizuar të dhënat e tjera. Por AI arriti të lexojë informacionin e fshehur dhe zbuloj gjininë e embrioneve. “Si e more vesh?”, kujton Molly se e pyeti AI-n. “Ishte fshehur me të zezë.”
Me sa duket ChatGPT mund të “shohë” përtej pjesëve të mbuluara në imazhe apo PDF.
Molly thekson se shumë gra përdorin ChatGPT në udhëtimin e tyre të fertilitetit. Ajo vetë ka marrë shumë ndihmë nga AI, si analizimi i përqindjeve të suksesit në çdo hap të IVF për të krijuar pritshmëri realiste. Megjithatë, ajo tani këshillon që çdo informacion i ndjeshëm të mos ngarkohet në chatbot pa fshirë plotësisht apo prerë fotografinë që përmban informacionet private.
Përkundër këtij incidenti, ajo nuk pendohet që ka përdorur AI në këtë proces. Megjithatë, ekspertët paralajmërojnë se përdorimi i AI në mjekësi duhet të bëhet me kujdes. Studime të fundit tregojnë se shumica e informacionit të dhënë nga AI-të mjekësore është e pasaktë, edhe pse paraqitet me vetëbesim dhe referenca false.
