Gjatë zhvillimit të Samitit të Bashkimit Evropian me Ballkanin Perëndimor ditën e djeshme në Tiranë, u arrit një marrëveshje mjaft e rëndësishme për sa i përket tarifave roaming.
Duke nisur nga data 1 tetor e vitit të ardhshëm të gjithë qytetarët e Ballkanit Perëndimor do të paguajnë më pak për planet roaming ndërkohë që vizitojnë vende të tjera në Bashkimin Evropian. Në këtë Samit ishin të pranishëm dhe përfaqësuesit e kompanive telefonike.
Kjo duket të jetë një masë e përkohshme që do të ndihmojë deri në momentin kur tarifat roaming të zerohen, që sipas sekretares së përgjithshme të RCC, Majlinda Bregu mund të vijë në vitin 2027.
Duhet të kujtojmë se brenda Ballkanit Perëndimor tarifat roaming u hoqën gjatë korrikut të vitit të kaluar në një marrëveshje midis Shqipërisë, Kosovës, Maqedonisë së Veriut, Serbisë, dhe Bosnjë-Hercegovinës.
Presidenti i Këshillit Evropian, Charles Michel, u shpreh para samitit se kjo marrëveshje është shumë e rëndësishme: “Sot do të nënshkruajmë një marrëveshje për tarfiat roaming, është një arritje konkrete. Ky është një hap shumë i rëndësishëm, një tjetër element është mbështetja që duam t’i japin Ballkanit Perëndimor në raport me krizën energjetike dhe vështirësitë energjetike që janë pasoja të luftës së Rusisë në Ukrainë. Është emocionuese që në këtë rajon të kemi një takim të këtij niveli. Ne jemi shumë të bindur që e ardhmja e Europës dhe fëmijës tanë do të jetë më e begatë me Ballkanin Perëndimor, pjesë të Europës.”
Zëvëndëskryeministrja Belinda Balluku tregoi në një deklaratë: “Përbën një nga arritjet madhore të viteve të fundit. Falë kësaj marrëveshjee qytetarët vitin e ardhshëm do përjetojnë konkretisht ndryshime të mëdha dhe pozitive, do zgjerohet aksesi në oferta të larmishme.”
