Sipas zyrtarëve libanezë, të paktën nëntë civilë janë vrarë dhe mbi 2,750 janë plagosur pasi pajisjet sinjalizuese në pronësi të një numri të madh anëtarësh në njësi dhe institucione të ndryshme të Hezbollahut shpërthyen të martën. Hezbollahu fajësoi Izraelin për sulmin dhe u zotua se do të përgjigjet. Sulmi vjen në mes të tensioneve në rritje midis Izraelit dhe Hezbollahut.
Çfarë janë pajisjet sinjalizuese ose “pagers”?
“Pagers” janë pajisje të vogla të përdorura për komunikim të cilat ishin të përhapura përpara se telefonat celularë të ishin gjerësisht të aksesuseshëm. Këto pajisje shfaqin mesazhe të shkurtra për përdoruesit, të cilat shpërndahen nga një operator qendror.
Ndryshe nga telefonat celularë, pagers punojnë me valë radio, operatori dërgon një mesazh me anë të radiofrekuencave – në vend të internetit – unike për pajisjen e marrësit. Mendohet se teknologjia bazë e përdorur në pager-at si dhe mbështetja e tyre në hardware fizik do të thotë se ato janë më të vështira për t’u monitoruar, duke i bërë ato të përdorura nga grupime të tilla si Hezbollah, ku lëvizshmëria dhe siguria janë parësore.
Çfarë ndodhi me këto pajisje?
Këto pajisje nisën të shpërthenin në mënyrë të sinkronizuar rreth orës 16:45 dhe shpërthimet zgjatën për rreth një orë. Midis personave të vrarë, janë konfirmuar një vajzë 10 vjeçare si dhe djali i drejtuesit të Hezbollah, Mohammad Mahdi Ammar.
Nuk dihet ende se si u bë i mundur shpërthimi i pajisjeve sinjalizuese. Mendohet se rrjeti i valëve radio që mundëson komunikimin përmes pajisjeve sinjalizuese është hakeruar nga izraelitët, duke bërë që sistemi të transmetojë një sinjal që nxiste një shpërthim të tillë. Gjithashtu nuk përjashtohet mundësia që “pagers” mund të kenë qenë të modifikuara që në fillim për të shpërthyer pas marrjes së një komande.
Si është e mundur që një nga këto pajisje të shpërthejë?
Nëse bateria e litiumit e pager-it do të nxitej të mbinxehej, kjo do të niste një proces të quajtur “thermal runaway”. Në thelb, do të ndodhte një reaksion zinxhir kimik, duke çuar në një rritje të temperaturës dhe përfundimisht në shpërthimin e dhunshëm të baterisë.
Megjithatë, nxitja e atij reaksioni zinxhir brenda pajisjeve të shumta që nuk janë lidhur kurrë me internetin nuk është aspak e thjeshtë. “Duhet të kesh një gabim në vetë pager-in [në mënyrë që] të mbinxehet si rezultat i rrethanave të caktuara,” tha Baydoun, duke spekuluar se ato rrethana ka shumë të ngjarë të lidhen me modifikimin e kodit në një pager.
