Nëse po mendoni të blini një version të ri të orave inteligjente të Apple, ndoshta do të ishte më e arsyeshme që të prisni dhe pak kohë para se ta bëni një veprim të tillë, deri sa Apple të prezantojë gjeneratën më të fundit dhe më të mirë të këtyre orave, që mund të vijnë me shumë përmirësime.
Më poshtë do të tregojmë 5 arsye se përse është mirë që të prisni për këtë gjeneratë.
Ridizenjim rrënjësor
Raportimet e ndryshme në internet tregojnë se Apple po planifikon një ridizenjim të rëndësishëm për Apple Watch, e cila do të korespondojë dhe me përvjetorin e 10-të të këtij produkti. Apple Watch mund të jetë më i hollë se aktualisht, si dhe do të ofrojë fiksimin e rripave në mënyrë magnetike, duke liruar më shumë hapësirë brenda orave për një bateri më të madhe apo komponentë të tjerë.
Ekran microLED
Analisti Jeff Pu beson se Apple po punon për të sjellë në treg një orë të re smart me ekran 2.1” micro-LED, megjithatë ajo mund të vijë në disa madhësi të ndryshme. micro-LED konsumon më pak bateri se teknologjia OLED dhe ka jetëgjatësi më të gjatë, kontrast më të mirë dhe ngjyra më të ndriçuara.
Monitorimi i presionit të gjakut
Mark Gurman tregon se Apple po punon për të ofruar një shërbim për monitorimin e presionit të gjakut në Apple Watch në vitin 2024. Ky shërbim nuk do të shfaqë nivelin e presionit me shifra të sakta, por do të paralajmërojë përdoruesin kur ka një rritje të rëndësishme të presionit të gjakut.
Zbulimi i hipertensionit
Si një pjesë e shërbimit të monitorimit të nivelit të presionit të gjakut, Apple Watch pritet të zbulojë gjithashtu episodet e hipertensionit arterial. Gjithashtu ora do të këshillojë përdoruesit që të kryejnë një matje me aparatet profesionale të tensionit, për të lexuar vlerat në mënyrë të saktë.
Zbulimi i apnesë së gjumit
Gjithashtu një tjetër shërbim që pritet të vijë në gjeneratën e ardhshme të Apple Watch pritet të jetë zbulimi i apnesë së gjumit, një çrregullim mund të shkaktojë prishjen e cilësisë së gjumit apo dhe hipoksemi.
Kur do të prezantohet kjo seri e re e Apple Watch?
Zakonisht Apple prezanton modelet e reja të orave smart në shtator së bashku me serinë e re të iPhone-ve. Megjithatë Apple mund të organizojë dhe një event special nëse planifikon të prezantojë “Apple Watch X” për përvjetorin e 10-të të produktit. Për herë të parë Apple Watch u prezantua në shtator të vitit 2014.
