Shkencëtarët kanë zbuluar se është e mundur që egoizmi i njerëzve të pakësohet duke stimuluar elektrikisht dy zona specifike të trurit. Studimi u krye në University of Zurich dhe përfshiu 44 vullnetarë, të cilëve iu kërkua të ndanin një shumë parash mes vetes dhe një partneri anonim. Gjatë eksperimentit, studiuesit aplikuan një stimulim të lehtë elektrik në zonat frontale dhe parietale të trurit. Kur këto dy zona u stimuluan njëkohësisht, pjesëmarrësit priren të jepnin më shumë para.
Sipas profesor Christian Ruff, një nga autorët kryesorë të studimit, efektet nuk ishin shumë të mëdha, por ishin të qëndrueshme nga ana statistikore. Ai shpjegoi se stimulimi rriti “gatishmërinë për të paguar” dhe për të ndarë burime me të tjerët. Përveçse ndihmon në kuptimin e mekanizmave bazë të sjelljes njerëzore, ky zbulim mund të ketë rëndësi klinike, veçanërisht për trajtimin e individëve me çrregullime të sjelljes sociale, të cilët e kanë të vështirë të marrin perspektivën e të tjerëve.
Efektet e stimulimit ishin afatshkurtra. Prof. Ruff e krahasoi këtë me ushtrimet fizike: një seancë e vetme nuk sjell ndryshim të qëndrueshëm, por përsëritja e rregullt mund të sjellë transformime afatgjata në tru. Studimi, i botuar në revistën shkencore PLoS Biology, ndërtohet mbi kërkime të mëparshme që kishin treguar se këto dy zona të trurit “komunikojnë” me njëra-tjetrën kur njerëzit marrin vendime më altruiste.
Këto zona lidhen respektivisht me vendimmarrjen dhe empatinë. Kur merrej një vendim më pak egoist, aktiviteti i tyre sinkronizohej. Kjo e shtyu ekipin të testonte nëse stimulimi jo-invaziv mund t’i “shtynte” njerëzit drejt vendimeve më bujare. Një vullnetar anonim e përshkroi ndjesinë si “një dush të ngrohtë” në lëkurën e kokës dhe tha se nuk e ndjeu stimulimin si ndikim të drejtpërdrejtë në vendimet e tij.
Sipas Prof. Ruff dhe bashkautorit të tij, Jie Hu nga East China Normal University, ky studim ofron prova të qarta shkak-pasojë, pasi duke ndryshuar komunikimin në një rrjet specifik të trurit, ndryshon edhe sjellja. Studiuesit theksojnë se eksperimentet janë të rregulluara rreptësisht nga ana etike, ndryshe nga ndikimet e pakontrolluara që vijnë nga rrjetet sociale apo reklamat.
