Nga transfuzionet e gjakut e deri tek terapitë gjenetike, studiuesit po eksplorojnë ide radikale për zbulimin e një trajtimi që jo vetëm që do t’i lejojë njerëzit të jetojnë më gjatë, por do të qëndrojnë të shëndetshëm edhe në pleqëri.
Tani, një studim i ri në minj dhe majmunë sugjeron se një përbërës për një jetë më të gjatë dhe më të shëndetshme mund të jetë taurina, një mikronutrient që gjendet zakonisht në pijet energjike. Nuk është e qartë nëse rezultatet tek kafshët përkthehen tek njerëzit dhe do të nevojitet një studim i madh klinik afatgjatë për të parë nëse rezultatet do të jenë pozitive.
“Nëse taurina po rregullon të gjitha këto procese që nuk janë më shumë aktive me kalimin e moshës, ndoshta nivelet e taurinës në qarkullimin e gjakut ndikojnë në shëndetin e përgjithshëm dhe jetëgjatësinë.” tha Vijay Yadav, profesor i gjenetikës në Columbia University i cili drejtoi këtë studim.
Yadav ishte duke studiuar osteoporozën kur zbuloi se taurina ndihmon në formimin e kockave. Kjo, e kombinuar me punën e studiuesve të tjerë që lidhin nivelet e taurinës me çështje të tjera shëndetësore, e shtyu atë të mendojë për rolin e saj të mundshëm në plakje.
Për të eksploruar këtë marrëdhënie të mundshme midis taurinës dhe jetëgjatësisë, ekipi i Yadav – i përbërë nga më shumë se 50 studiues nga e gjithë bota – filloi duke monitoruar nivelet e taurinës në gjakun e minjve, majmunëve dhe njerëzve dhe zbuloi se ato bien ndjeshëm me moshën. Më pas, ata ndanë 250 minj të moshës së mesme në dy grupe, duke i dhënë një grupi një dozë ditore taurine dhe tjetrit një zgjidhje kontrolli. Në fund të eksperimentit, femrat dhe meshkujt në grupin e taurinës jetuan përkatësisht 12% dhe 10% më gjatë se ekuivalentët e tyre të kontrollit.
Kur studiuesit provuan eksperimentin me majmunët e moshës së mesme, duke ushqyer disa me taurinë për gjashtë muaj, ata raportuan se ky grup ishte më i shëndetshëm në të gjitha aspektet.
“Rezultatet janë në përputhje me mundësinë që mungesa e taurinës të kontribuojë në plakjen e njeriut.”
