Alergjitë ndaj kikirikut janë një lloj intolerance ushqimore që mund të shkaktojë reaksione serioze dhe potencialisht kërcënuese për jetën. Ato priren të ndodhin kur sistemi imunitar gabimisht identifikon proteinat në kikirikë si të dëmshme, duke shkaktuar një sulm alergjik.
Kikirikët janë një nga alergjenët ushqimorë më të zakonshëm dhe alergjitë ndaj kikirikut priren të vazhdojnë të jenë të pranishme deri në moshën madhore. Alergjitë e kikirikut janë të zakonshme, veçanërisht në vendet perëndimore. Prevalenca e alergjive të kikirikut duket se po rritet dhe vlerësohet se rreth 2.9% e popullsisë në Shtetet e Bashkuara janë alergjikë ndaj kikirikut.
Imunoterapia e mukozës së gojës (OMIT) synon të desensibilizojë sistemin imunitar ndaj alergeneve specifike gradualisht duke synuar në mënyrë specifike membranat mukoze brenda gojës. OMIT përfshin administrimin e sasive të vogla të një ekstrakti alergjen në mukozën e gojës, një praktikë që besohet se shkakton ndryshime imunologjike, duke çuar në tolerancë dhe jo në një përgjigje alergjike herën tjetër që një person ndeshet me alergjenin.
Tani, shkencëtarët kanë shpikur një lloj paste dhëmbësh që përdor OMIT për të reduktuar shanset që njerëzit me alergji nga kikirikët të kenë një reaksion alergjik. “OMIT përdor një pastë dhëmbësh të formuluar posaçërisht për të shpërndarë proteinat alergjike të kikirikut në gojë“, tha alergologu William Berger, autor i studimit. “OMIT si një mekanizëm shpërndarjeje për proteinat e kikirikut ka potencial të madh për desensibilizimin ndaj alergjive ushqimore. Për shkak të shpërndarjes specifike dhe administrimit të thjeshtë, ai ka aftësi desensibilizimi të përmirësuara.”
Studiuesit ndoqën 32 pjesëmarrës me alergji nga kikiriku midis moshës 18 dhe 55 vjeç. Dy të tretave të pjesëmarrësve iu dha pastë dhëmbësh me kikirikë, ndërsa pjesës tjetër iu ofrua një produkt i ndryshëm me qëllim krijimin e efektit placebo. Doza e pastës së dhëmbëve me kikirikë u rrit gradualisht gjatë eksperimentit 48-javor.
Sipas Dr. Berger, studiuesit vunë re se 100% e atyre që përdornin këtë pastë dhëmbësh toleronin vazhdimisht dozën më të lartë të paracaktuar, pa asnjë pjesëmarrës që raportoi përgjigje të rënda sistemike. Efektet e pakta anësore që u shfaqën ishin të lehta, të lokalizuara dhe të përkohshme si ndjesia e kruarjes.
