Kjo është hera e parë në botë që shkencëtarët arritën të lançonin drejt hapësirës një satelit të bërë nga druri. Ndërsa rrotullohet rreth planetit nga një largësi prej 400 km, studiuesit do të studiojnë nëse druri është mjaftueshëm i fortë për hapësirën.
I quajtur LignoSat, sipas fjalës latine për drurin, sateliti nisi udhëtimin të hënën në bordin e një misioni SpaceX për në Stacionin Ndërkombëtar të Hapësirës. Ai përfundimisht do të lëshohet në orbitë, ku instrumentet do të mësojnë se si druri përballon kushtet e vështira të hapësirës për 6 muaj.
“Me lëndën drusore, një material që mund ta prodhojmë vetë, do të jemi në gjendje të ndërtojmë shtëpi, të jetojmë dhe të punojmë në hapësirë përgjithmonë”, tha për Reuters Takao Doi, një astronaut dhe profesor në Universitetin e Kiotos. Studiuesit e Universitetit të Kiotos dhe kompania e drurit Sumitomo Forestry filluan të punojnë së bashku në projektin e drurit hapësinor në vitin 2020. Ata kryen teste të ekspozimit në hapësirë nga Stacioni Ndërkombëtar Hapësinor për më shumë se 240 ditë në 2022. Pas testimeve vendosën të përdorin Hoonoki, një lloj druri Magnolia, pasi ai ishte lehtësisht i punueshëm dhe i qëndrueshëm.
Druri përdoret shpesh për të bërë këllëfë tradicionalë të shpatës në Japoni, sepse është rezistent ndaj copëtimit, raporton Reuters. Mungesa e ujit ose e oksigjenit në hapësirë mbron satelitin e drurit nga zjarri ose prishja, sipas ekipit nga Universiteti i Kiotos. Ata gjithashtu do të testojnë se sa efektiv është druri në mbrojtjen e procesorëve gjysmëpërçues nga rrezatimi hapësinor.
Ata gjithashtu mendojnë se satelitët prej druri mund të jenë një opsion më pak ndotës sesa satelitët metalikë që lëshojnë grimca të oksidit të aluminit kur ato digjen gjatë rihyrjes. Në 50 vjet, ekipi i Doi thuhet se parashikon rritjen e drurit për shtëpitë e drurit në Hënë dhe Mars.
