Roboti Curiosity i NASA ka gjetur disa prova të reja të ekzistencës së lumenjve që njëherë e një kohë rridhnin në një zonë të veçantë të Marsit. Agjencia hapësinore amerikane raportoi zbulimin e një sipërfaqje shkëmbore të valëzuar, gjë që sugjeron se sasi të mëdha uji lëviznin në këtë zonë.
“Kjo është prova më e mirë e ekzistencës së ujit që ne kemi parë gjatë gjithë këtij misioni në Mars,” tha një nga studiuesit. Ashwin Vasavada, shkencëtar në Jet Propulsion Laboratory tha se roboti ka ekzaminuar shumë zona të ndryshme dhe nuk ka gjetur në asnjërën prej tyre prova kaq të mira.
Curiosity ka kërkuar për prova të tilla në pjesën e poshtme të malit të mprehtë që dikur mendohej se ishte mbuluar nga lumenj të ndryshëm. Në të shkuarën Marsi ishte shumë më i ngjashëm me Tokën, me një klimë shumë më të ngrohtë dhe shumë ujë, mirëpo tani është shndërruar në një shkretëtirë.
Sipërfaqja shkëmbore e alvëzuar u gjet vetëm 800m mbi bazën e malit. Ajo ishte kaq e fortë sa Curiosity e kishte të pamundur ta gërmonte. Këto gjurmë tregojnë për prezencën e ujit shumë kohë më parë pasi miliarda vite më parë, valët në sipërfaqjen e një lumi të cekët përzienin sedimentet në pjesën e poshtme, duke krijuar këtë pamje të valëzuar.
