WhatsApp po teston një shërbim të ri për përdoruesit e iPhone, që u lejon atyre të menaxhojnë dy llogari të ndara brenda së njëjtit aplikacion, sipas WABetaInfo. Shërbimi i ri është zbuluar në versionin më të fundit beta përmes TestFlight në iOS dhe prezanton një seksion të quajtur “Account List” në menunë e cilësimeve. Kjo u mundëson përdoruesve të shtojnë një llogari të dytë pa pasur nevojë të përdorin WhatsApp Business apo metoda alternative.
Aktualisht, beta mbështet deri në dy llogari. Këto mund të jenë numra të rinj, llogari ekzistuese të WhatsApp Business, llogari të përdorura më herët në pajisje të tjera, ose llogari shoqëruese që lidhen përmes skanimit të një QR kodi. Secila llogari ruan historikun e vet të bisedave, konfigurimet e rezervimit të të dhënave, njoftimet dhe cilësimet e privatësisë, duke ofruar kështu ndarje të plotë funksionale.
Për të kaluar nga një llogari në tjetrën, përdoruesit mund të hyjnë në seksionin “Account List”, të shtypin dhe mbajnë tastin Settings për një zgjedhje të shpejtë, ose të bëjnë dy herë tap tek Settings për të kaluar automatikisht në llogarinë tjetër. Në rast njoftimesh, WhatsApp shfaq si emrin e dërguesit ashtu edhe llogarinë që i ka marrë, për të shmangur çdo paqartësi.
Veçoria funksionon gjithashtu me App Lock, duke kërkuar Face ID, Touch ID ose kodin e pajisjes për të hyrë në llogaritë që janë të mbrojtura, gjë që rrit sigurinë për ata që mbajnë llogari personale dhe profesionale në të njëjtin telefon.
WhatsApp nuk ka dhënë ende një datë zyrtare të prezantimit për publikun e gjerë, por faza e testimit tregon se funksioni mund të bëhet i disponueshëm së shpejti. Kjo veçori pritet të jetë veçanërisht e dobishme për përdoruesit që balancojnë komunikimin personal dhe atë të punës brenda një pajisjeje të vetme.
