Sa herë që hapim TikTok, dy video luhen njëra pas tjetrës. E para tregon katër ushtarë izraelitë që kërcejnë me armë, duke patur në sfond një qiell blu. Tjetra është një grua e re që flet nga dhoma e saj e gjumit, me një mbishkrim të spikatur pro-palestinez.
Algoritmi i TikTok përcakton se çfarë lloj videosh duam të shikojmë dhe rekomandon përmbajtje të ngjashme, bazuar në cilën nga dy videot shikoni deri në fund. Algoritmet funksionojnë në mënyrë të ngjashme edhe për platformat e tjera të mediave sociale dhe kjo do të thotë se disa përdorues po shtyhen drejt përmbajtjes gjithnjë e më përçarëse rreth Izraelit dhe Gazës, e cila vetëm forcon pikëpamjet dhe paragjykimet e tyre ekzistuese.
Ka rëndësi sepse bisedat në rrjetet sociale mund të formojnë opinionin publik dhe të normalizojnë thirrjet në protesta dhe më gjerë. Kjo përfshin Mbretërinë e Bashkuar, ku mediat sociale duket se kanë inkurajuar shumë njerëz që normalisht nuk janë politikisht aktivë, të ndërmarrin veprime. Deputetja Liberal Demokrate, Layla Moran, nëna e së cilës është palestineze, më thotë se ajo dhe politikanë të tjerë po marrin një “fluks të madh” mesazhesh, përfshirë nga të rinjtë që kërkojnë një armëpushim.
Ata duket se janë frymëzuar për të vepruar për shkak të “videove të TikTok dhe Reels të Instagram të shpërndara nëpër WhatsApp“.
Deputeti konservator Andrew Percy, nënkryetari i grupit Conservative Friends of Israel, thotë se lufta “ka tërhequr më pak interesin e banorëve” në zonën e tij elektorale sesa çështjet e tjera. Megjithatë, ai thotë: “Pjesa më e madhe e përmbajtjes që shpërndahet është problematikisht antisemitike. Ky ka qenë një problem i vërtetë shumë kohë përpara këtij konflikti – dhe këtë herë, media sociale e ka bërë këtë të ndodhë me shpejtësi.”
Videot nga blogerët në terren në Gaza dhe përdoruesit pro-palestinezë – provokojnë reagimin më pozitiv midis përdoruesve të rinj. Ndërkohë, përmbajtja nga ushtarët me Forcat e Mbrojtjes izraelite duket më e kuruar – duke u përpjekur të përfshihet në tendencat virale të TikTok.
