Samsung ka prezantuar zyrtarisht Galaxy Z TriFold, pajisjen e saj më të avancuar deri tani, e cila vjen me dy mentesha dhe tre panele që palosen si një “libër futurist”. Telefoni debuton më 12 dhjetor në Korenë e Jugut me çmim rreth $2500 për versionin 512GB, ndërsa në SHBA mbërrin në tremujorin e parë të vitit 2026.
TriFold hapet në një ekran të brendshëm 10 inç, me rezolucion 2160 × 1584, ndriçim maksimal 1600 nits dhe refresh rate adaptiv 1–120 Hz. Në këtë mënyrë përdoruesit kanë hapësirë të mjaftueshme për të ekzekutuar tre aplikacione njëkohësisht ose për të përdorur Samsung DeX në mënyrë të pavarur pa monitor shtesë, një risi e rëndësishme për produktivitetin. Ekrani i jashtëm është 6.5 inç 1080p, me ndriçim maksimal 2600 nits, i ngjashëm me atë të Z Fold 7.
Çdo panel ka trashësi të ndryshme: paneli qendror 4.2mm (me USB-C), paneli më i hollë vetëm 3.9mm (me hapësirën për kartën SIM), ndërsa i treti 4.0mm. Dy panelet e jashtme palosen brenda në panelin qendror, ndryshe nga Huawei Mate XT që paloset në formë Z. Samsung deklaron se ekrani kryesor ka kaluar një test të 200,000 palosjeve, ekuivalente me përdorim ditor prej 100 palosjesh për 5 vjet.
Kur është i mbyllur, TriFold është 12.9mm i trashë, më shumë se Galaxy S25 Ultra dhe pak më shumë se Huawei Mate XT (12.8mm). Pesha është 309 gram, pak më shumë se konkurrenti kinez.
Pjesa e pasme përbëhet nga një polimer i përforcuar me fibra qelqi-qeramike, i dizenjuar për të qenë rezistent ndaj përplasjeve. Dy menteshat kanë dizajn dual-rail dhe janë të mbrojtura me titanium. Pajisja mban vlerësimin IP48, që do të thotë rezistencë e plotë ndaj ujit, por jo pluhurit.
TriFold përfshin tre kamera të pasme:
- 200 MP wide f/1.7
- 12 MP ultrawide
- 10 MP telefoto 3x
Ka edhe dy kamera selfie 10 MP, një në secilin ekran. Bateria ndahet në tre panele dhe arrin kapacitetin 5600 mAh. Brenda gjendet çipi Snapdragon 8 Elite for Galaxy, së bashku me 16GB RAM.
Për fat të keq Samsung ka konfirmuar se ky smartphone nuk do të ofrojë mbështetje për S Pen, dhe pse Z Fold 7 e ofron një shërbim të tillë.
