Me kalimin e kohës po bëhet gjithnjë e më e vështirë për të dalluar me një shikim të shpejtë një pajisje flagship nga një midrange, sidomos në rastin e Samsung Galaxy A54 5G. Prandaj Geek Room vendosi ta testojë për disa javë para se të shkruante këtë review mbi 3 veçoritë kryesore që, sipas nesh, e bëjnë mid-range-in më cilësor të vitit.
Këtë vit duket se Samsung është përpjekur për të përmirësuar qëndrueshmërinë e këtij smartphone-i, me një ekran më të ndritshëm, procesor më të fuqishëm dhe një dizajn mjaft të këndshëm. Le të analizojmë më në detaje këtë smartphone.
Cilësia e materialeve dhe ekrani
Le të fillojmë me cilësinë e materialeve të përdorura në këtë smartphone: Galaxy A54 vjen me një panel xhami në pjesën e parme si dhe në atë të pasme. Ky është një avantazh kundrejt të gjitha pajisjeve të tjera midrange, si Pixel 6a, të cilat përdorin materiale plastike në pjesën e pasme të smartphone-it. Për fat të mirë Samsung ka arritur të ofrojë dhe çertifikim IP67 për rezistencën ndaj ujit dhe pluhurave në Galaxy A54 5G, që nuk është i shpeshtë në këtë segment.
Ekrani është një cilësi e shtuar e këtij smartphone-i. Paneli i madh 6.4” 1080p OLED vjen gjithashtu me refresh rate 120Hz, duke e bërë pajisjen të duket më e shtrenjtë se çmimi aktual. Ekrani arrin ndriçimin maksimal 1000 nits në mënyrë që ju të mos keni probleme me shikimin e ekranit nën dritën direkte të diellit.
Bateria dhe proçesori
Prej disa gjeneratash këto smartphone kanë ofruar një jetëgjatësi shumë të mirë baterie falë kapacitetit 5,000mAh. E njejta gjë është e pranishme dhe në A54 5G. Kjo pajisje ofron karikimin e shpejtë 25W (nëpërmjet karikueses që duhet ta bleni vetë, pasi nuk është e pranishme në kuti), por karikimi wireless nuk është i pranishëm.
Pra, nuk keni pse të shqetësoheni mbi baterinë e këtij smartphone-i pasi mund të zgjas lehtësisht gjatë gjithë ditës.
Proçesori që fuqizon këtë pajisje është Exynos 1380, i cili është në gjendje të përballojë grafikat mjaft kërkuese të lojrave intensive si Genshin Impact. Ky proçesor shoqërohet gjithashtu nga 6GB RAM dhe 128GB internal storage.
Nuk duhet të harrojmë që Samsung ka premtuar të mbështesë software-in e pajisjeve të saj me deri në 4 OS updates dhe 5 vite security updates.
Kamerat
Ky smartphone është i pajisur me një kamera kryesore 50MP me stabilizim optik, një kamera 12MP ultrawide, një macro 5MP dhe kamera selfie 32MP. Fotografitë nga kamera kryesore duken mjaft mirë, megjithatë Samsung ka disi tendencën që të ekspozojë disi më tepër ngjyrat në fotografi. Dhe videot duket mirë, pasi A54 5G arrin të regjistrojë video 4K/30fps.
Megjithatë performance e kameras nuk është po kaq e mirë në kushte jo të përshtatshme me pak ndriçim, dhe fotografitë me blur nuk arrijnë dot të caktojnë qartë kufinjtë.
Për të shkrepur fotografi të objekteve që nuk lëvizin gjatë natës ju ndihmon opsioni night mode, duke gjeneruar rezultate të pëlqyeshme.
Në përgjithësi, duhet të theksojmë se ky smartphone ofron një eksperiencë shumë të mirë duke marrë në konsideratë dhe çmimin midrange të tij. Dhe për nga dizajni është shumë e vështirë ta dallosh nga një Samsung Galaxy S23/ S23+.
