Muaji i fundit ka qenë tepër i ngarkuar për Samsung, me një sërë rrjedhjesh informacioni që kanë zbuluar detaje të rëndësishme për pajisjet e saj të ardhshme flagship. Nga fakti që një YouTuber arriti të blejë Galaxy S26 Ultra para prezantimit zyrtar, duket se surprizat po vijnë herët këtë vit.
Së fundmi, brenda versioneve të rrjedhura të One UI 9, është zbuluar një veçori e re e quajtur “Foreign Material Detection”, e dedikuar për pajisjet me ekran të palosshëm. Kjo funksion synon të mbrojë ekranin duke paralajmëruar përdoruesin nëse telefoni nuk është palosur plotësisht për shkak të pranisë së ndonjë materiali të huaj, si pluhur apo papastërti. Ideja është të parandalohet dëmtimi i ekranit, një nga problemet më të ndjeshme te pajisjet foldable. Për përdoruesit më të avancuar, ekziston edhe mundësia për ta çaktivizuar këtë paralajmërim.
Në të njëjtët skedarë janë gjetur edhe imazhe të reja grafike që tregojnë linjën e ardhshme të telefonave të palosshëm për vitin 2026, përfshirë Fold 8, Flip 8 dhe variantin Wide Fold. Ndërsa Fold 8 dhe Flip 8 nuk sjellin surpriza të mëdha në dizajn, Wide Fold bie në sy për raportin më të gjerë të ekranit, me një formë që i ngjan më shumë një pasaporte sesa modeleve aktuale.
Një detaj interesant në këto pamje është prania e qosheve më të buta në të gjitha pajisjet, gjë që mund t’i bëjë ato më të rehatshme për t’u mbajtur në dorë. Megjithatë, nuk është ende e qartë nëse kjo është një zgjedhje reale dizajni apo thjesht një pasaktësi grafike në materialet e rrjedhura.
Mbetet gjithashtu e paqartë nëse funksioni Foreign Material Detection do të ofrohet edhe për modelet më të vjetra foldable. Duke qenë se One UI 9 është ende në fazë shumë të hershme zhvillimi, gjithçka mund të ndryshojë. Asgjë nuk është përfundimtare derisa të vijë njoftimi zyrtar, ndaj do të duhet të presim disa muaj për konfirmimin final.
