Samsung ka zhvilluar një prototip të ri ekrani që do të mund të rrotullohet 360 gradë falë mekanizmit të ri të mbylljes.
Samsung Display, filiali i kompanisë kryesore që prodhon ekranet për Samsung, prezantoi prototipin e ri të ekranit dhe mekanizmit palosës gjatë CES 2023. Ekrani “Flex In & Out” mund të rrotullohet 360 gradë, pra pajisja mund të paloset nga të dyja anët, siç bëhet e ditur nga zëdhënësi John Lucas.
Një tjetër përmirësim i ri i bërë në mekanizimin mbyllës të pajisjes është zvogëlimi i shenjës së palosjes në mes të ekranit. Kjo gjë ndodh sepse do të ushtrohet më pak presion mbi ekran për sa kohë pajisja nuk do të paloset në mënyrë të rrafshët, por do të ketë një hapësirë midis dy pjesëve të ekranit në formën e një pike uji.
Kjo nuk është hera e parë që Samsung Display ka shfaqur këtë prototip që paloset në të gjitha drejtimet. Në 2021, një pajisje e ngjashme u prezantua në International Meeting for Information Displays, por në atë rast ekrani palosej në formën e shkronjës S me disa segmente.
Ekziston një mundësi që kjo teknologji e re të aplikohet në pajisjen më të re Galaxy Z Fold 5. Raportimet tregojnë se Z Fold 5 do të ketë një shenjë palosje shumë pak të dukshme falë ridizenjimit të mekanizmit palosës.
article by Xhonald Mamo