Rregullatorët francezë kanë aprovuar përditësimin e software-it për pajisjet iPhone 12 në Francë, pasi Apple u kërcënua se shitjet e telefonave do të pezulloheshin në fillim të këtij muaji për shkak të niveleve të rrezatimit.
Në fillim të shtatorit, Franca urdhëroi Apple të ndalonte shitjet e iPhone 12 dhe të “rregullonte” pajisjet ekzistuese për të bërë që ato të përputhen me standardet evropiane për sa i përket niveleve të rrezatimit elektromagnetik.
Rritja e rrezatimit elektromagnetik të emetuar e vërejtur me kalimin e kohës nga rregullatorët duket se ka qenë rezultat i përditësimeve të njëpasnjëshme të software-it të lëshuara nga Apple dhe nuk ishte i pranishëm kur iPhone 12 u lançua në 2020. ANFR urdhëroi Apple të “heqë iPhone 12 nga tregu francez nga 12 shtatori për shkak se tejkalon kufirin e rrezatimit“.
Agjencia i tha gjithashtu Apple që të tërheqë çdo iPhone 12 që ka shitur ndonjëherë në vend. Ministrat thanë më vonë se megjithëse niveli i rrezatimit ishte mbi standardin e pranuar, nuk ishte i rrezikshëm dhe njerëzit ishin të sigurt për të vazhduar përdorimin e telefonave, siç raportuan mediat lokale.
Apple më vonë tha se do të lëshonte një përditësim të software-it për përdoruesit e iPhone 12 në Francë për të adresuar shqetësimet e rrezatimit. Rregullatori francez ANFR u përgjigj duke thënë se do të testonte përditësimin e software-it. Nëse përmes përditësimit të software-it do të arrihej ulja e këtij niveli rrezatimi, ANFR tha se iPhone 12 do të jetë në përputhje me standardet evropiane të aplikuara në Francë dhe urdhri i tërheqjes nga tregu do të anulohet.
