Shpesh herë ne kemi dëgjuar histori të ndryshme se si hakerat kanë nisur të shesin të dhënat personale në forume të ndryshme, prandaj dhe ne kemi disa dyshime të vogla kur dorëzojmë pajisjet tona për t’u rregulluar nga teknikët.
Sigurisht ekziston mundësia e të bërit një factory reset të smartphone-it para se ta dorëzoni tek tekniku, por si fillim juve ju duhet të ruani të gjitha të dhënat e pajisjes më parë, në mënyrë që t’i riktheni ato kur pajisja është rregulluar.
Për të shmangur këto probleme Samsung ka prezantuar një modalitet të ri i cili quhet “Repair Mode”. Për momentin ky shërbim ofrohet në Korenë e Jugut, mirëpo me kalimin e kohës Samsung pritet ta sjellë shërbimin dhe në vende të tjera të botës, duke shtuar gjithashtu dhe përmirësime të tjera të këtij shërbimi.
Sipas një deklarate në gjuhën koreane të zbuluar nga SamMobile kuptohet se ju mund të aktivizoni shërbimin e ri nga “Battery and Device Care” në Settings. Samsung nuk ka shpjeguar se çfarë teknologjie ka përdorur në këtë shërbim, megjithatë dihet se kur ai aktivizohet, do të fshehë të gjitha të dhënat personale si fotografitë, mesazhet apo adresat që përdorni.
Vetëm aplikacionet e instaluara nga vetë kompania do të mund të shikohen nga tekniku. Për të rifituar akses në të dhënat tuaja, mjafton të dilni nga ky modalitet duke përdorur shenjën e gishtit apo pattern që ju keni regjistruar.
