Pas prezantimit të pamjeve të reja në mënyrë të vazhdueshme prej disa javësh, Huawei ka lançuar zyrtarisht telefonin e parë në botë me 3 pjesë të palosshme, që është po aq i shtrenjtë sa mendohej.
Në Kinë, çmimet për Mate XT Ultimate Design fillojnë nga rreth $2,809 për modelin me hapësirë ruajtëse 256 GB – që është afërsisht $300 më shumë se një MacBook Pro 16 inç. Të gjitha modelet janë të pajisura me 16 GB RAM dhe janë në dispozicion dy variante shtesë të memories që kushtojnë $3,089 për 512 GB dhe $3,370 për 1 TB.
Shitësi me pakicë në Kinë, Vmall raportoi se kishte mbi 3.7 milionë porosi për këtë pajisje dhe para se çmimi të bëhej i ditur. Mate XT përmban një dizajn me dy mentesha që paloset në një formë “Z”, duke e lejuar atë të përdoret në një sërë formash të ndryshme.
Kur pajisja përdoret plotësisht e palosur, përdoruesit mund të navigojnë në ekranin OLED 6,4 inç, shumë e ngjashme me një smartphone normal. Kur shpaloset plotësisht, madhësia e ekranit rritet në 10,2 inç (2,232 x 3,184) dhe mund të përdoret edhe kur hapet pjesërisht në një konfigurim më të vogël 7,9 inç.
Pajisja vjen me një bateri 5600 mAh dhe mbështet karikim 66W me tela ose 50W me valë. Në pjesën e pasme janë të pranishme 3 kamera: një kamerë kryesore 50MP, një kamerë ultra e gjerë 12MP dhe një kamerë periskop 12MP. Kamera selfie në pjesën e përparme është 8MP dhe ndodhet në ekranin më të majtë kur pajisja është shpalosur plotësisht.
Nuk dihet ende nëse kjo pajisje do të vijë në tregun ndërkombëtar.
