Gjatë javës së kaluar është raportuar disa herë se Samsung mund të prezantojë pajisjet e palosshme pak më herët seç pritej. Zakonisht seria e re e smartphone-ve të palosshëm prezantohet në gusht vit pas viti, megjithatë kësaj here mendohet se kompania ka afruar datën e prezantimit në korrik.
Sipas një raporti të ri nga Chosun Media, kompania ka vendosur që të organizojë eventin Samsung Unpacked për prezantimin e Galaxy Z Flip 5 dhe Z Fold 5 në datën 26 korrik 2023, rreth 2 javë më herët se zakonisht. Gjithashtu në vend që eventi të organizohet në Barcelonë apo New York si vitet e kaluara, këto smartphone do të prezantohen në Seoul.
Pas prezantimit në 26 korrik, pritet që pajisjet e reja të palosshme të nisin të shiten në 11 gusht. Ky lançim përpara kohës së planifikuar mund të vijë për shkak të rënies së shitjeve të proçesorëve gjysëmkonduktorë nga Samsung, të cilat kanë prekur në mënyrë të konsiderueshme marzhin e fitimit. Në këtë mënyrë kompania kërkon të rrisë sadopak përfitimet në vitin 2023.
Galaxy Z Flip 5dhe Z Fold 5 do të vijnë me ndryshime strukturore të rëndësishme, sidomos në mekanizmin e mbylljes, i cili do të bëjë që shenja e palosjes në ekran të duket shumë pak dhe smartphone-t të palosen pa hapësirë midis ekraneve.
