Apple po përgatitet të prezantojë një version të ri të asistentit zanor Siri, me fokus të fortë te privatësia e përdoruesve, në përpjekje për të konkurruar me chatbot-et më të avancuara të inteligjencës artificiale. Sipas gazetarit të Bloomberg, Mark Gurman, kompania pritet të sjellë një funksion që fshin automatikisht bisedat e përdoruesve, ngjashëm me opsionin ekzistues në aplikacionin Messages.
Raporti thekson se përdoruesit do të kenë mundësi të zgjedhin sa gjatë ruhen bisedat me Siri: 30 ditë, një vit ose përgjithmonë. Gjithashtu, do të ofrohet një opsion që përcakton nëse Siri duhet të vazhdojë një bisedë të mëparshme duke ruajtur kontekstin, apo të nisë çdo herë një komunikim krejtësisht të ri.
Megjithatë, kjo qasje mund të ketë edhe pasoja për performancën e inteligjencës artificiale. Modelet moderne të AI zakonisht mbështeten në sasi të mëdha të dhënash personale për të përmirësuar përgjigjet dhe personalizimin. Ndryshe nga rivalët e saj, Apple raportohet se përdor më shumë të dhëna sintetike sesa informacion real të përdoruesve për trajnim, duke kufizuar aksesin në të dhëna sensitive.
Kjo strategji mund të shërbejë si argument marketingu për kompaninë, e cila prej vitesh e ka vendosur privatësinë në qendër të produkteve të saj. Ndërkohë, kompani të tjera të AI janë përballur me kritika dhe procese ligjore për përdorimin e chatlog-ve në hetime apo padi gjyqësore.
Versioni i ri i Siri pritet të prezantohet zyrtarisht gjatë konferencës WWDC 2026, që nis më 8 qershor.
