Subway Surfers City, vazhdimi i lojës shumë të njohur mobile Subway Surfers, do të prezantohet zyrtarisht më 26 shkurt për pajisjet iOS dhe Android. Regjistrimi paraprak për lojën është tashmë i hapur, duke u dhënë fansave mundësinë të përgatiten për një përvojë të re brenda universit të Subway Surfers.
Sipas njoftimit zyrtar, loja e re ndërtohet mbi bazat e titullit origjinal, por këtë herë i rikthen lojtarët nga turneu global i serisë drejt vendlindjes së saj imagjinare: Subway City. Ky metropol modern dhe multikulturor përfshin katër zona të ndryshme që mund të zhbllokohen dhe eksplorohen: The Docks, Southline, Sunrise Blvd dhe Delorean Park. Çdo zonë ofron ambiente të veçanta dhe sfida të reja, duke e bërë lojën më të larmishme vizualisht dhe në gameplay.
Një element kyç i Subway Surfers City është përmbajtja sezonale. Çdo sezon do të sjellë lagje të reja për t’u eksploruar, si dhe personazhe, veshje dhe hoverboard-e të reja, duke e mbajtur përvojën e lojës të freskët dhe të përditësuar vazhdimisht.
Përveç lokacioneve të reja, loja prezanton edhe mekanika të reja loje, si “speed pads” për rritje të shpejtësisë, një lëvizje të re stomp dhe një mburojë elastike që ndihmon lojtarët të shmangin pengesat. Lojtarët do të kenë gjithashtu mundësinë të zhbllokojnë tre mënyra loje: Classic Endless, që ruan formatin klasik të vrapimit pa fund; City Tour, që përfshin nivele dhe misione të strukturuara; dhe Events mode, e cila ofron sfida dhe gara të kufizuara në kohë.
Subway Surfers u lançua fillimisht në vitin 2012 dhe, sipas zhvilluesit SYBO, ka kaluar 4.5 miliardë shkarkime në total, me rreth 100–150 milionë lojtarë aktivë çdo muaj. Përveç kësaj, SYBO ka publikuar edhe spin-off-in Subway Surfers Tag, ekskluziv për Apple Arcade.
