Niantic Labs tha se kompania Scopely nën pronësinë e Arabisë Saudite do të blejë divizionin e saj të video-lojërave për $3.5 miliardë, pasi firma amerikane e realitetit të shtuar e zhvendos fokusin në teknologjinë gjeohapësinore sepse nuk arriti të rikrijojë suksesin e hitit të saj të madh të vitit 2016 “Pokemon Go”.
Kjo marrëveshje u bë e ditur gjatë ditës së mërkurë dhe tregon për ambiciet e Arabisë Saudite për t’u bërë “qendra më e madhe globale” për video-lojërat. Fondi sovran i pasurisë së mbretërisë, nëpërmjet Savvy Games, bleu Scopely për $4.9 miliardë në vitin 2023, si pjesë e një shtytjeje më të gjerë nga vendi për të diversifikuar pasurinë përtej lëndëve djegëse.
Niantic tha se do të shpërndante $350 milionë shtesë për aksionerët e saj sipas marrëveshjes. Ajo gjithashtu do të shkrijë biznesin e saj gjeohapësinor të AI në një firmë të re të quajtur Niantic Spatial, e cila do të drejtohet nga themeluesi dhe CEO i Niantic, John Hanke. Niantic Spatial do të financohet me $250 milionë kapital – 200 milionë dollarë nga bilanci i Niantic dhe 50 milionë dollarë nga Scopely.
Të gjithë investitorët origjinalë të Niantic do të vazhdojnë të jenë gjithashtu aksionerë të Niantic Spatial. Lëvizja pason disa vite të vështira për Niantic. Pasi “Pokemon Go” u bë një nga lojërat e suksesshme celulare, kompania u përpoq të përsëriste suksesin e saj por iu desh të pushonte punonjësit në 2022 dhe 2023.
Për Arabinë Saudite marrëveshja bazohet në një plan për të investuar afro $38 miliardë në iniciativa që lidhen me industrinë përmes Savvy Games Group. Savvy Games është një investitor i madh në kompanitë globale të video-lojërave, duke përfshirë Nintendo, në të cilën zotëron rreth 7.54% të aksioneve pas një uljeje të vogël të interesit të saj vitin e kaluar.
