Video loja Call Of Duty ka filluar të përdorë AI për të luftuar sharjet gjatë luajtjes online.
Prodhuesi i lojës, Activision tha se mjeti i moderimit, i cili përdor teknologjinë e machine-learning, do të jetë në gjendje të identifikojë gjuhën diskriminuese dhe ngacmimet në kohë reale. Machine-learning lejon AI të mësojë dhe përshtatet pa patur udhëzime të qarta njerëzore, duke përdorur algoritme dhe të dhënat me të cilat është mësuar për të njohur modelet.
Shërbimi që po përdoret në Call Of Duty, i quajtur ToxMod, është prodhuar nga një kompani e quajtur Modulate. Shefi i teknologjisë i Activision, Michael Vance tha se kjo do të ndihmonte ta bënte lojën “një përvojë argëtuese, të drejtë dhe mikpritëse për të gjithë lojtarët“. Biseda me sharje ka qenë prej kohësh një problem për video-lojërat në internet, me gratë dhe minoritetet veçanërisht në shënjestër.
Activision tha se mjetet e tij ekzistuese, duke përfshirë aftësinë që lojtarët kanë për të raportuar të tjerët dhe monitorimin automatik të bisedës me tekst dhe emrave të përdoruesve, kanë arritur të kufizojnë komunikimin e një milion llogarive. Kodi i sjelljes i Call Of Duty ndalon ngacmimet, duke përfshirë fyerjet në bazë të racës, orientimit seksual, identitetit gjinor, moshës, kulturës, besimit dhe vendit të origjinës.
Vance tha se ToxMod lejon që përpjekjet e moderuara të kompanisë të rriten ndjeshëm duke kategorizuar sjelljet toksike bazuar në ashpërsinë e saj, përpara se një njeri të vendosë nëse duhet të ndërmerren veprime. Lojtarët nuk do të jenë në gjendje të çaktivizojnë këtë shërbim AI, përveç nëse e çaktivizojnë plotësisht bisedën me zë në lojë.
