Battle Royale është kryefjala e momentit, Fortnite, Apex Legends dhe Call of Duty kanë disa vite që bëjnë ligjin prandaj për të marrë një copë nga torta, të fusësh disa skuadra lojtarësh të luftojnë kundra njëri tjetrit për një kohë të kufizuar nuk mjafton.
Hyper Scape duket se e ka zgjidhjen; parkour.
E kur ky element i botës së videogaming nuk ia ka dalë të shpëtojë cilëndo lojë që tenton ta integrojë? Kjo dhe të tjera vijnë tek fëmija më i fundit i Ubisoft.
Viti 2054, një botë distopike në të ardhmen. Një kompani e quajtur Prisma Dimension ka krijuar një botë virtuale të quajtur Hyper Scape tek e cila njerzit mund të hyjnë për arsye nga më të ndryshmet, përfshi biznesin apo edukimin dhe sigurisht luftën.
Aktiviteti më i famshëm i kësaj bote është Crown Rush, çka është edhe objektivi kryesor i lojës.
Kur fillon lojën ndodhesh brenda një kapsule mbi qiellin e qytetit Neo Arcadia. Deri këtu gjithçka e njohur por ama në ndryshim nga të tjerat, harta ndryshon çdo herë që fillon një ndeshje. 9 distriktet e ndryshme të qytetit herë pas here nuk shfaqen ndaj nuk mundesh të zbresësh gjithmonë tek i njëjti vend, duke stimuluar kështu kreativitet në taktika.
Lojtarët mund të mbajnë dy armë dhe dy aftësi, aftësitë apo armët e reja që gjenden rrugës mund të përzihen me të parat për tu bërë më të dobishme. Lëvizja në hartë është mbreslënëse teksa mundesh të lëvizësh nga njëri cep në tjetrin apo edhe nga njëra zonë në tjetrën fare shpejtë. Ndërtesat kalohen me një të hedhur me sustë, dhe të hidhesh nga taraca në taracë me një kërcim të dyfishtë. Stili i lëvizjes së lirë dhe mundësitë vertikale janë absolutisht një risi.
Ngushtimi i hartës ndodh nëpërmjet distrikteve të cilat fillojnë të kalben ngadalë, duke të detyruar të largohesh drejt lagjes rezistente tek e cila do të shfaqet edhe kurora.
Moment kritik ku të gjithë nxitojnë drejt një objekti, ndërkohë që qëllojnë e përpiqen të qëndrojnë gjallë. Fatlumi që arrin të marrë kurorën duhet ta mbajë për 45 sekonda dhe të përpiqet të rrijë gjallë.
Nga 5 deri në 15 minuta lojë, shpejtësia duket se është kyç në këtë lojë me nivle të larta adrenaline.
Hyper Scape do të dalë për Xbox One, Playstation 4, dhe PC këtë verë falas për të gjithë, dhe pritshmëritë janë goxha të larta.
