Një ngjarje që duket si nga filmat fantashkencë u zhvillua së fundmi në UP.Summit, Teksas, ku u mbajt gara e parë e makinave fluturuese, e quajtur “Formula One of the skies”. 4 automjete fluturuese Jetson One tërësisht elektrike me shpejtësi deri në 102 km/orë dhe autonomi deri në 32 km, u përballën në një pistë ajrore me kthesa të ngushta dhe manovra të rrezikshme, duke dhuruar pamje spektakolare për publikun.
Ngjarja shënoi gjithashtu fluturimin e parë në formacion katër-personësh, duke treguar potencialin e këtyre makinave fluturuese për manovra të koordinuara. Tomasz Patan, bashkëthemelues i Jetson, tha se energjia e turmës ishte e jashtëzakonshme dhe se kjo ishte një dëshmi e gatishmërisë së kompanisë për të udhëhequr një kapitull të ri në aviacion.
Jetson One është një e-VTOL me një vend për një pasagjer, e pajisur me tetë rotorë të fuqishëm dhe trup prej karboni dhe alumini. Pajisja peshon 115 kg, prej të cilave 60 kg janë bateri, duke ofruar rreth 20 minuta fluturim deri në 457 metra lartësi. Në raste emergjente pilotët mund të fluturojnë edhe me një rotor të vetëm dhe mund të aktivizojnë prashuta balistike që mund të përdoret në rast emergjence.
Çmimi i kësaj makine fluturuese është aktualisht $128,000, me rritje të parashikuar në $148,000 në fillim të nëntorit. Ajo që e bën më të veçantë është se në SHBA nuk kërkohet patentë piloti, pasi kompania promovon moton “Everyone is a pilot”, duke e bërë fluturimin të aksesueshëm për më shumë njerëz.
Modeli i parë u dorëzua në shtator tek Palmer Luckey, ndërsa aktualisht ekzistojnë rreth 550 porosi të prapambetura. Bashkëthemeluesi Peter Ternström thotë se qëllimi është të transformohen qytetet, duke i bërë më të gjelbërta dhe duke lëvizur njerëzit ajrore, duke synuar që brenda një dekade të bëjë çdo person një pilot. Gara e parë është vetëm fillimi i një epoke të re të lëvizjes ajrore.
