Presidenti i SHBA, Donald Trump, ka njoftuar se do të urdhërojë Pentagonin dhe agjenci të tjera qeveritare të identifikojnë dhe të publikojnë dosje që lidhen me alienët dhe objektet fluturuese të paidentifikuara (UFO). Ai e bëri të ditur këtë vendim në rrjetet sociale, pasi akuzoi ish-presidentin Barack Obama për zbulim të informacionit të klasifikuar, pas një interviste ku Obama foli për mundësinë e ekzistencës së jetës jashtëtokësore.
Megjithatë, Obama sqaroi më vonë se nuk kishte parë prova që alienët “kanë patur kontakt me ne”, por theksoi se universi është aq i madh sa që, statistikisht, ka gjasa të ketë jetë diku tjetër. Nga ana e tij, Trump deklaroi para gazetarëve në Air Force One se nuk e di nëse alienët janë realë apo jo, por tregoi se me deklasifikimin e dokumenteve mund ta “nxjerrë Obamën nga telashet”.
Në platformën e tij Truth Social, Trump tha se, për shkak të interesit të madh publik, do të udhëzojë Sekretarin e Luftës dhe agjenci të tjera për të nisur procesin e identifikimit dhe publikimit të dosjeve qeveritare që lidhen me jetën jashtëtokësore, fenomenet ajrore të paidentifikuara (UAP) dhe UFO-t, si dhe çdo informacion tjetër përkatës.
Interesi publik për UFO-t është rritur sidomos pas vitit 2017, kur disa ish-zyrtarë të Pentagonit publikuan video të Marinës amerikane në media si The New York Times dhe Politico, ku shfaqeshin objekte të panjohura në ajër. Kjo çoi në dëgjesat e para në Kongres për UFO-t pas 50 vitesh, në vitin 2022. Po atë vit, Pentagoni krijoi Zyrën për Zgjidhjen e Anomalive në të Gjitha Fushat (AARO) për të mbledhur raportet mbi këto incidente. Sipas të dhënave publike, shumica e rasteve mbeten të pazgjidhura, por ato që identifikohen zakonisht rezultojnë të padëmshme.
