Komiteti i Këshillit Evropian për Pagesat ka miratuar kërkesën e Shqipërisë për të marrë pjesë në zonën gjeografike të skemave të pagesave SEPA. Duke nisur nga 21 nëntori 2024, Shqipëria është zyrtarisht anëtare e SEPA-s. Vendi ynë është tashmë një prej disa shteteve të Ballkanit Perëndimor që anëtarësohen në SEPA, si një parakusht për anëtarësimin në BE.
Banka e Shqipërisë, me këtë pjesëmarrje, realizoi një nga ambiciet e saj kryesore në kuadër të procesit të integrimit europian. Guvernatori i Bankës së Shqipërisë, Gent Sejko, u shpreh: “Pjesëmarrja e Shqipërisë në shtrirjen gjeografike të SEPA-s shënon një moment historik për Shqipërinë, duke reflektuar vite përpjekjesh të përkushtuara dhe angazhim të vazhdueshëm nga institucionet e vendit, sektori financiar dhe partnerët. për t’u përafruar me standardet dhe parimet evropiane. Përfshirja në SEPA do të ketë ndikim në zhvillimin financiar dhe ekonomik të Shqipërisë, duke kontribuar në integrimin e saj të mëtejshëm me tregun e BE-së.”
Pjesëmarrja e Shqipërisë në SEPA sjell përfitime të shumëfishta për qytetarët shqiptarë dhe ekonominë. Ulja e kostove është përparësia e parë, më e prekshme dhe më e matshme për të gjithë qytetarët dhe bizneset shqiptare. Me fjalë të thjeshta, përmes SEPA-s, qytetarët dhe bizneset shqiptare do të kryejnë pagesat dhe transfertat e tyre ashtu si homologët e tyre europianë dhe anasjelltas.
Kryerja e transfertave përmes SEPA-s do të bëjë që kostot e pagesave ndërkufitare në euro me vendet anëtare të jenë të paktën 5 herë më të ulëta. Nga vlerësimet paraprake del se kursimet për ekonominë shqiptare mund të arrijnë në të paktën 20 milionë euro në vitin e parë, për t’u rritur në mënyrë progresive në vitet në vijim. Në të njëjtën kohë, koha e ekzekutimit të pagesave zvogëlohet dhe konkurrenca forcohet përmes prezantimit të produkteve dhe shërbimeve të përditësuara dhe të sigurta.
Në një plan më të gjerë, përfitime të tjera do të shtrihen në sektorët e tregtisë, turizmit, investimeve direkte etj. Parashikimet vlerësojnë se ekonomia shqiptare do të përfitojë qindra milionë euro nga pjesëmarrja në SEPA.
Puna për pjesëmarrjen në SEPA nisi në vitin 2021, kur Banka e Shqipërisë u bë pjesë e projektit rajonal “Përparimi i modernizimit dhe integrimit të sistemeve të pagesave në Ballkanin Perëndimor”.
Banka e Shqipërisë, në sektorin e pagesave, ka ndërmarrë përpjekje të konsiderueshme për të harmonizuar sistemet dhe rregulloret kombëtare të pagesave me standardet e Bashkimit Evropian.
