Ngritja herët në mëngjes për të shkuar në shkollë është një ndër gjërat më të bezdisshme për adoleshentët. Tashmë një studim i ri ka sugjeruar se nisja e shkollës 1 orë më vonë në mëngjes mund të përmirësojë humorin e tyre, gjë e cila ndikon dhe në rritjen e performancës në shkollë.
Studiuesit provuan një eksperiment të tillë në një shkollë në Brazil, duke shtyrë orën e nisjes së mësimit me 1 orë dhe monitoruan gjumin, përgjumjen në shkollë dhe shëndetin emocional të studentëve. Në përgjithësi, studentët ndiheshin më pak të inatosur, më pak të depresionuar dhe më pak të lodhur në shkollë pas këtij ndryshimi.
Këto rezultate të reja mund të nxisin qeveri të ndryshme në botë të marrin masa për shtyrjen e orarit të nisjes së mësimit me 1 orë.
“Nisja e shkollës pak më vonë është tepër efektive në rritjen e kohëzgjatjes së gjumit, përmirësimit të përgjumjes dhe gjendjes emocionale të të rinjve.” thanë autorët në këtë studim.
Studiuesit treguan se ritmi cirkadian – cikli 24 orësh që është pjesë e orës së brendshme të trupit tonë – ndryshon në mënyrë të konsiderueshme gjatë adoleshencës dhe mund ta bëjë të vështirë për adoleshentët që të qëndrojnë zgjuar gjatë orëve të mëngjesit. Para pubertetit trupi nxit përgjumjen gjatë orës 20:00 ose 21:00, ndërkohë që pas pubertetit kjo orë shkon në 22:00 ose 23:00. Kjo gjë e bën më të vështirë që ato të zgjohen herët në mëngjes.
