Pavarësisht luftës së tmerrshme në Gaza dhe zgjerimit të konflikteve në rajon, temperaturave më të nxehta të regjistruara në këtë vit dhe zhvillimit të inteligjencës artificiale – Ora e Fundit të Botës do të qëndrojë sërisht në 90 sekonda para mesnatës.
Vitin e kaluar, Bulletin of the Atomic Scientists, i cili përcakton këtë kohë çdo vit, e çoi orën akoma më pranë, në 90 sekonda nga mesnata – apo shpërthimi. Kjo është koha më e afërt që është raportuar ndonjëherë nga ky buletin, dhe ky vit vazhdon me të njëjtat tendenca të vitit të kaluar.
Megjithatë mos u shqetësoni, kjo orë thjesht “vizualizon afërsinë metaforike të njerëzimit me katastrofën globale”, sipas Buletinit. Artistja Martyl Langsdorf e projektoi orën për kopertinën e revistës Bulletin në vitin 1947, duke e vendosur atë në shtatë minuta para mesnatës, sepse “ashtu i dukej mirë”. Tani, kjo kohë është caktuar nga ekspertë të shkencës dhe sigurisë, të cilët vlerësojnë kërcënimet e bëra nga njeriu, duke përfshirë ndryshimet klimatike, armët bërthamore dhe “teknologjitë e reja përçarëse” si AI dhe bioteknologjia.
“Ka dy mesazhe kyçe në deklaratën tonë dhe ato janë: mbetja e kohës prej 90 sekondash para mesnatës, njësoj si vitin e kaluar, është thellësisht e paqëndrueshme dhe nuk duhet të kënaqemi nga ky rezultat dhe dy: avancimi i teknologjisë po tejkalon aftësinë tonë për t’i kontrolluar ato,” tha Rachel Bronson, presidente dhe CEO e Bulletin of the Atomic Scientists, gjatë një deklarate për shtyp.
