Mamuthi i cili është zhdukur prej shumë kohësh nga sipërfaqja e Tokës, pritet të rikthehet mes nesh brenda 4 vitesh. Kjo deklaratë u bë nga Colossal, një kompani bioteknologjike e cila po punon vazhdimisht për të ringjallur bishën antike.
Vitin e kaluar Colossal arriti të siguronte fonde shtesë me vlerë $60 milionë për të vazhduar punën e editimit të gjenomës së mamuthëve, që nisi në vitin 2021. Nëse kjo tentativë do të jetë e suksesshme, atëherë Colossal do të bëjë të mundur rikthimin e kësaj specie rezistente ndaj të ftohtit, dhe me shumë mundësi do të rritet në të njejtin ekosistem ku ka jetuar shumë vite më parë.
Colossal mendon se migrimet në masë të mamuthëve kishin një rol mjaft aktiv në mbrojtjen e shëndetit të Arktikut, prandaj rikthimi i këtyre gjallesave mund të ketë një impakt pozitiv në ekosistemin tonë. ADN origjinale e mamuthit është 99.6% e njejtë me një elefant aziatik.
“Shumë persona mendojnë se kjo krijesë është zhdukur njëherë e mirë nga planeti ynë. Mirëpo ne shkencëtarët nuk mund ta pranojmë një gjë të tillë, dhe kemi nisur proçesin e ringjalljes së mamuthëve. Ekipet tona kanë grumbulluar disa provëza ADN dhe kanë nisur të editojnë gjenet në mënyrë që të bëhet i mundur rikthimi i megafaunës që gjendej në Arktik.” tregon kompania në një deklaratë.
Përmes editimit të gjeneve do të arrihet të krijohet një embrion i mamuthit, që më pas do të vendoset në trupin e një elefanti afrikan i cili do të lindë mamuthin.