Makinat dhe kamionët autonomë nuk do të jenë prezentë në treg dhe për disa vite të tjera, megjithatë tregu për automatizimin e disa funksioneve gjatë drejtimit është zgjeruar shumë gjatë viteve të fundit, madje tashmë shumica e makinave janë të pajisura me kamera dhe sensorë.
Spartan Radar është një startup nga Kalifornia i cili ka arritur të grumbullojë fonde me vlerë $17 milionë për të zhvilluar një software që do të bëjë të mundur skanimin e objekteve përreth plot detaje dhe nëpërmjet radarëve apo sensorëve më të lirë në treg, duke përmirësuar performancën e sistemeve aktuale të drejtimit autonom.
Spartan Radar u krijua para 2 vitesh dhe falë ideve inovatore ajo ka arritur të tërheqë vëmendjen e shumë kompanive, duke përfshirë këtu dhe Microsoft. Që nga viti 2021 kompania ka arritur të sigurojë fonde me vlerë deri në $42 milionë.
Përfshirja e Microsoft bie mjaft në sy, dhe CEO i Spartan Radar, Nathan Mintz, tregoi se “është njësoj si të kalosh nga DOS në Windows 10”.
“Ne ofrojmë rezolucion 5 herë më të lartë duke grumbulluar 1/4 e pjesëve, madje në raste të caktuara rezolucioni është deri në 10 herë më i lartë.” shton Mintz.
Software-i i Spartan Radar pritet të jetë i gatshëm për të dalë në treg në vitin 2025, megjithatë nuk është bërë ende e ditur se cilat do të jenë kompanitë e para që do të përfitojnë nga kjo teknologji.
