Një studim i ri ndërkombëtar ka arritur në përfundimin se burrat kanë ndikim më negativ në mjedis sesa gratë. Studimi, i titulluar “Men, masculinities, and the planet at the end of (M)Anthropocene”, u realizua nga 22 studiues nga 13 vende dhe u publikua në International Journal for Masculinity Studies.
Sipas studiuesve, burrat kanë zakonisht gjurmë karboni më të lartë, kryesisht për shkak të udhëtimeve më të shumta, përdorimit të transportit, turizmit dhe konsumit më të madh të mishit. Ata argumentojnë se konsumimi i mishit vazhdon të lidhet me konceptin tradicional të maskulinitetit në shumë shoqëri. Gjithashtu, aktivitetet që konsiderohen tradicionalisht “mashkullore”, si gjuetia, peshkimi dhe drejtimi i industrive të rënda, ndikojnë negativisht në klimë dhe mjedis.
Profesor Jeff Hearn nga Universiteti i Huddersfield tha se ekzistojnë tashmë shumë kërkime që tregojnë ndikimin negativ të disa sjelljeve mashkullore në mjedis, por kjo temë diskutohet rrallë në debatet publike dhe politikat për zhvillim të qëndrueshëm.
Përveç gjurmës më të lartë të karbonit, studiuesit thonë se burrat shqetësohen më pak për ndryshimet klimatike dhe janë më pak të gatshëm të ndryshojnë mënyrën e jetesës për të ndihmuar mjedisin. Ata gjithashtu rezultojnë më pak aktivë në politikën mjedisore dhe më pak mbështetës të partive që promovojnë drejtësi klimatike.
Sipas raportit burrat, sidomos elitat politike dhe ekonomike në vendet e pasura perëndimore, dominojnë industri me ndikim të madh ekologjik, si bujqësia industriale, industria automobilistike, teknologjitë e inteligjencës artificiale dhe sektori ushtarak. Autorët theksojnë se mohimi i ndryshimeve klimatike shpesh lidhet me forma të maskulinitetit ekstrem dhe ideologji të djathta radikale.
Megjithatë, studiuesit sqarojnë se këto gjetje nuk vlejnë për të gjithë burrat. Ata pranojnë se shumë meshkuj janë aktivë në mbrojtjen e mjedisit dhe po punojnë për të ndryshuar këto tendenca.
