Muzika na ndikon në mënyra të ndryshme emocionale, ka këngë të cilat mund të na sjellin lot, por ka të tjera që bëjnë të na ngrihen qimet e lëkurës përpjetë. Dhe kjo nuk është vetëm shprehje, por tashmë një fakt shkencor, publikuar në edicionin e fundit të Frontiers in Neuroscience duke lidhur mornicat me disa pjesë kyçe të trurit në sistemet e shpërblimit dhe kënaqësisë.
Studimi i bërë nga University of Burgundy Franche-Comté në Francë u kërkoi 18 pjesëmarrësve të dëgjonin ato këngë të cilat atyre u shkaktonin emocionet maksimale. Studiuesit më pas monitoruan aktivitetin e trurit të tyre nëpërmjet sistemit EEG të aftë për të njohur sinjalet elektrike që vijnë nga pjesë të ndryshme të trurit.
Si rezultat u vu re se truri reagonte në tre zona kryesore, të lidhura me proçesimin emocional, lëvizjen, dhe proçesimin e tingujve e muzikës. Këto zona me aktivitet kombinohen për të provokuar prodhimin e hormonit të dopaminës i cili sjell ndjesinë dhe emocionet e mira duke rezultuar në ethet që përjetojmë ndërsa jemi duke dëgjuar një pjesë të caktuar muzikore.
Rezultatet sigurojnë një perspektivë të mirë në studimet e emocionit muzikor por edhe përdorimit të saj në kontekste të tjera.
