Rregullatorët amerikanë kanë paditur Amazon me pretendimet se gjigandi i shitjeve online po ruan në mënyrë të paligjshme monopolin e saj në treg.
Komisioni Federal i Tregtisë (FTC) tha se Amazon përdor “një grup strategjish antikonkurruese dhe të padrejta për të rritur çmimet dhe për të mbytur konkurrencën”. Megjithatë Amazon u kundërpërgjigj duke thënë se padia ishte “e gabuar për sa i përket fakteve dhe ligjit, dhe ne mezi presim ta çojmë atë çështje në gjykatë”.
Shefja e FTC, Lina Khan, ka vite që e ka në qendër të vëmendjes Amazon. Në vitin 2017, zonja Khan, atëherë vetëm 29 vjeçe, publikoi një artikull të madh akademik duke argumentuar kompania i kishte shpëtuar shqyrtimit për mbytjen e konkurrencës. Që nga emërimi i saj i befasishëm si Kryetare e FTC në vitin 2021, ky rast është pritur gjerësisht – dhe është parë si një test vendimtar i udhëheqjes së saj.
Dominimi i një numri firmash të fuqishme të teknologjisë ka bërë që disa politikanë amerikanë të bëjnë thirrje për aksion që do të nxisë më shumë konkurrencë në kërkimin online, shitjen me pakicë dhe mediat sociale.
Agjencia, së bashku me 17 avokatë shtetërorë, pretendon se Amazon është një “monopolist” që ndalon rivalët dhe shitësit të ulin çmimet. Rregullatori gjithashtu pretendoi se veprimet e kompanisë “degradojnë cilësinë për blerësit, mbingarkojnë shitësit, mbysin inovacionin dhe parandalojnë rivalët që të konkurrojnë në mënyrë të drejtë kundër Amazon“.
Sidoqoftë, Amazon thotë se nëse padia “e gabuar” e FTC do të ishte e vërtetë, do të shihej përmes më pak produkteve për të zgjedhur, çmimeve më të larta dhe dërgesave më të ngadalta për konsumatorët.
