Elon Musk ka thyer rekordin për humbjen më të madhe personale të pasurisë në historinë e botës. Nga nëntori i vitit 2021 deri në dhjetor të vitit 2022, Elon Musk ka humbur rreth $165 miliardë nga pasuria e tij, siç tregohet dhe në një postim në blog të Guinnes World Records.
Këto të dhëna janë marrë nga Forbes, mirëpo Guiness shton në përshkrim se burime të tjera tregojnë se humbjet e Musk mund të jenë akoma dhe më të mëdha. Një ndër faktorët kryesorë që çuan në këtë rekord negative ishte blerja prej $44 miliardësh e Twitter, e cila shkaktoi shumë shqetësime tek investitorët kryesorë të kompanisë së makinave elektrike Tesla, pasi ata mendojnë se Musk nuk po fokusohet mjaftueshëm tek Tesla.
Humbjet e mëdha të Musk lanë pas mbajtësin e mëparshëm të këtij rekordi negativ, Masayoshi Son, një investitor japonez në kompanitë teknologjike, i cili humbi $58.6 miliardë në vitin 2000.
Megjithatë duhet të kujtojmë se rënia në pasurinë e Musk vjen kryesisht nga ulja e çmimit të aksioneve të Tesla, të cilat mund të rifitojnë vlerën e tyre dhe të rrisin sërisht pasurinë e drejtuesit.
Në dhjetor Elon Musk humbi pozicionin si “njeriu më i pasur në botë”, duke ia lënë vendin Bernard Arnault, CEOs së kompanisë LVMH.
