Një “portal” që transmetonte pamje të drejtpërdrejta nga New York dhe Dublini, duke lidhur dy vendet në kohë reale, u rihap të dielën pasi u mbyll për një kohë të shkurtër javën e kaluar për shkak të sjelljeve të papërshtatshme të qytetarëve.
Ekspozita e artit pamor e quajtur “Portal” përmban disa instalacione ku secila ka një ekran gjigant dhe një videokamerë, të vendosura pranë ndërtesës Flatiron në New York dhe një në rrugën O’Connell, në kryeqytetit irlandez. Secila anë e portalit transmeton pamje të drejtpërdrejta midis dy qyteteve, duke u mundësuar vizitorëve në të dyja anët të ndërveprojnë me njëri-tjetrin në kohë reale – sikur të dy qytetet të merrnin pjesë në një video-telefonatë gjigante.
Ekrani ka tërhequr dhjetëra mijëra vizitorë që kur u hap në fillim të këtij muaji. Por popullariteti i tij ka shkaktuar gjithashtu kaos. Të martën, Këshilli i Qytetit të Dublinit njoftoi se do të mbyllte portalin për shkak të “sjelljes së papërshtatshme nga një pakicë e vogël njerëzish“, pasi në internet po qarkullonin videot e një gruaje që shfaq gjoksin e saj drejt portalit, një burrë konsumon drogë para portalit si dhe një person tjetër nga Dublini që shfaq pamjet e 11 nëntorit drejt qytetarëve amerikanë.
Në një deklaratë që njoftonte rihapjen e portalit të dielën, organizatorët thanë se ata kanë zbatuar një “zgjidhje për sa i përket afërsisë” duke parandaluar njerëzit të afrohen në portalet dhe të mbajnë telefonat pranë kamerave.
Përveç shtimit të gardheve dhe pllakave ndarëse përpara portalit të New Jork, sapo një person të afrohet më tepër seç duhet në portal transmetimi i drejtpërdrejtë do të turbullohet.
