Me sa duket mundësia për të orgnizuar një përballje midis Mark Zuckerberg dhe Elon Musk në oktagon është e lartë, pasi është vetë Musk i cili publikoi në adresën e tij në Twitter (X) se përballja do të transmetohet drejtpërdrejtë në këtë platformë.
Zuck v Musk fight will be live-streamed on ?.
All proceeds will go to charity for veterans.
— Elon Musk (@elonmusk) August 6, 2023
Ideja jo e zakontë për t’u përballur në një kafaz erdhi në muajin korrik, ku dy miliarderët ranë dakord pas shkëmbimit të disa postimeve në rrjetet sociale që drejtojnë (Musk në Twitter, Zuckerberg në Instagram). Megjithatë bisedimet kanë qenë shumë të pakta gjatë kësaj kohe, madje burime të ndryshme në internet raportuan se Zuckerberg dyshonte se përballja me shumë mundësi nuk do të realizohej.
Interes për këtë përballje ka treguar dhe CEO e re e X, Linda Yaccarino, e cila ripostoi deklaratën e Musk me mbishkrimin se “do të shtynte çdo takim që kishte për ta ndjekur live”.
Më herët ne kemi parë se si Musk kishte nisur të trajnohej me Lex Fridman, mjaft i përgatitur në Jiu-Jitsu si dhe me kampionin e UFC George ST-Pierre. Zuckerberg, i cili është parë duke u stërvitur shumë dhe madje duke fituar luftime MMA, mbetet i favorizuar për të fituar në bastet sportive.
Presidenti i UFC-së, Dana White, mesa duket po ndërmjetëson bisedimet mes të dyve.
