Një përdorues i Twitter në Mbretërinë e Bashkuar me emrin Joseph Kelly është dënuar me 150 orë shërbim në komunitet pasi publikoi një tweet tepër fyes ndaj Captain Sir Tom Moore, një oficer i ushtrisë britanike i cili mblodhi para për National Health Service gjatë kohës së pandemisë.
Moore u shndërrua në një figurë kombëtare në Mbretërinë e Bashkuar pasi eci mbi 100 xhiro rreth kopshtit të tij para ditëlindjes së 100 të tij. Më vonë ai u përshëndet nga vetë mbretëresha Elizabeth.
Mirëpo një ditë pas vdekjes së tij Joseph Kelly publikoi një tweet ku shkruante: ”I vetmi ushtar britanik i mirë është një ushtar i vdekur. Digju burrë i vjetër, digjuuuu.”
Pas këtij tweet-i Kelly u dënua nga gjykata britanike, pasi në Mbretërinë e Bashkuar ekziston një legjislacion që lejon përdoruesit e rrjeteve sociale të dënohen kur dërgojnë mesazhe “tepër fyese”. Për t’u mbrojtur Kelly përdori faktet se ai kishte shumë pak ndjekës në platformë, se ishte në gjendje të dehur në momentin kur e kishte publikuar këtë tweet dhe se e kishte fshirë atë brenda 20 minutash.
“Ai e pranon se bëri një gabim. Niveli i kriminalitetit të tij ishte një postim ‘I dehur’ në kohën kur ai ishte në një gjendje të rënduar emocionale, të cilin ai e fshiu pothuajse menjëherë.” tha avokati mbrojtës i tij.
Kelly u dënua me 18 muaj mbikëqyrje dhe 150 orë punë të papaguar në komunitet.
