Hëna tashmë ka një krater të ri të dyfishtë i cili u krijua pasi trupi i një rakete është përplasur me sipërfaqjen e Hënës në datën 4 mars. Imazhet e reja të shpërndara nga Lunar Reconnaissance Orbiter i NASA, që rrotullohet rreth Hënës që nga viti 2009, kanë zbuluar dhe vendndodhjen e këtij krateri jo të zakonshëm.
Impakti i përplasjes krijoi 2 kratere që mbivendosen, një në lindje me diametër 18 metër dhe një në perëndim me diametër 16 metra.
Dhe pse astronomët e parashikuan krijimin e një krateri pasi panë se përplasja me Hënën e raketës ishte e pashmangshme, ato mbetën të habitur kur panë ekzistencën e dy kratereve. Zakonisht raketat e përdorura kanë peshën më të rëndë pranë motorit pasi pjesa tjetër e raketës është thjesht një rezervuar karburanti i boshatisur.
Megjithatë krijimi i dy kratereve tregon se ky objekt kishte pesha të krahasueshme në të dy anët e saj në momentin e përplasjes. Origjina ekzakte e trupit të raketës që rrokullisej në hapësirë prej vitesh nuk është e ditur, prandaj krateri i dyfishtë mund të ndihmojë astronomët të zbulojnë origjinën e tij.
Fillimisht mendohej se kjo raketë i përkiste raketës Falcon të SpaceX, dhe më pas u mendua se ishte një pjesë e mbetur nga misioni i vitit 2014 i Kinës, mirëpo të dyja këto rezultate nuk janë vërtetuar.
