Që në momentin e lançimit, Squid Games u shndërrua në një serial fenomenal. Shikuesit mbetën tepër të argëtuar nga elementët mbërthyes të këtij seriali dhe brenda pak ditësh aktorët koreanë të serialit ishin më të kërkuarit në internet.
Tashmë Netflix ka vendosur që të gëzojë sërisht fansat e Squid Game, jo me një sezon të ri por duke organizuar një program të ngjashëm me lojrat e serialit ku i ofron fituesit një çmim prej $4.56 milionësh. Pritet që ky program të transmetohet nga Netflix në nëntor të këtij viti, në bazë të deklaratës së publikuar në 18 maj.
Sigurisht që në këtë program televiziv nuk do të ketë asnjë situatë “jetë a vdekje” si në serialin e regjizorit Hwang Dong Hyuk. Do të marrin pjesë 456 konkurues në total në këtë format që do të sfidojnë njëri-tjetrin për të fituar çmimin e madh $4.56 milionë, që është një vlerë rekord e ofruar nga këto programe.
Aleancat, planet apo dhe tradhëtitë pritet të jenë elementët kryesorë të këtij programi, të cilët do të vendosin fatin e pjesëmarrësve. Ky program do të ketë në total 10 episode të cilat janë regjistruar në Mbretërinë e Bashkuar.
