Pas një eventi të suksesshëm të organizuar në shtator të vitit të kaluar me mbi 3,000 vizitorë, 50 folës të ndryshëm dhe 73 prezantimesh, Future2Tech do të rikthehet sërisht në Pallatin e Kongreseve këtë vit në datat 9-10 tetor.
Geek Room, si media më e madhe në Shqipëri dedikuar teknologjisë, do të jetë gjithashtu pjesë e panairit. Njësoj si vitin e kaluar do të mund të na gjeni në Demo Zone, ku së bashku me kompani të ndryshme do të prezantojmë produkte dhe shërbime novatore drejt vizitorëve në panair dhe online përmes transmetimit live.
Në këtë event do të marrin pjesë shumë organizata, institucione, shoqata dhe kompani nga sektorë të ndryshëm, të gjitha të lidhura me temën e përbashkët të teknologjisë. Para jush do të shpalosen shfaqje edukative, një zonë e dedikuar për hardware të ndryshëm si dhe për start-ups, fintech dhe zgjidhje softuerike.
Gjatë dy ditëve të panairit do të zhvillohen aktivitete të shumta si konferenca dhe workshope, që synojnë të japin informacion mbi tendencat më të fundit të teknologjisë, telekomunikacionit, etj.
Ekspozita do të zhvillohet në katin e parë dhe të dytë të Pallatit të Kongreseve, si dhe në hapësirën e jashtme. Kati i parë do të jetë epiqendra e inovacionit dhe hapësira kryesore e Future2Tech, plot energji dhe interaktivitet, ndërkohë që në katin e dytë do të gjendet një hapësirë ekstra e dedikuar për përmirësimin e eksperiencës suaj në Future2Tech.
Çfarë do të organizojë Geek Room në Demo Zone?
Demo Zone do të jetë një hapësirë që i dedikohet produkteve më interesante dhe më të avancuara të pranishme në event. Së bashku me kompanitë pionere, Geek Room do të mundësojë prezantimin për inovacionet më të reja, duke bërë të mundur që pjesëmarrësit në panair dhe online të marrin informacione të rëndësishme rreth ndikimit që këto teknologji kanë në jetën tonë. Më shumë detaje do të zbulohen ditët në vazhdim…
Ruani datat dhe ejani të na takoni në Demo Zone!
